U MP ka Lok Sabha na Shillong uwa man leh u President ka Meghalaya Pradesh Congress Committee (MPCC), u Vincent H Pala da kynthah u deiwa eh yaka sorkar hajrong i mih noh ka Hynniewtrep National Liberation Council (HNLC) nei yaklam yasuk.
Da ong u wa ka sorkar BJP ha Delhi wei kamjooh ha ka jylla Meghalaya ym chimkhia ki yei tyrwa yong ka HNLC wei ym bna ki yeiwa emkaam yong ka thaaiñ North East. Da ong u wa ka Congress kawa em ha ka Liang Pyrchah ha ka jylla ym embynta ko wow yaklam wei ym tip ko iyi iyi.
Hajrong ki phang wa ka HNLC da booh ko wow dawa, neiliang uwa yahkhmat ka Congress da ong u wa em ar bynta, itæ lada wan hi-eh wow pyndem da em kiwi ki kyndon wow leh, wei lada wan yaklam sñiawthooh katkam ka riti synchaar toh u em da kawi won ka luti, wei ka sorkar ymtoh wow pynmih daw pathan hawa lai chakhmat wei wow pyntikna wow pynmankaam yei yaklam yasuk.
Da ong u leh wa ka sorkar toh u yatai sani bha ko yei dawa wa da booh da ka HNLC, neibhah waroh ye wow man deiwa yaklam sñiawthooh lada ka sorkar chimkhia sakhiat ko yei kaam. Da ong u wa lada hap wow pyndam ya kitai ki mukotduma pyrchah ya ki dkhot ka HNLC leh em boon ki kyndon wa hap wow bood.
U Pala u da pynsñiaw u leh wa kyrchaan u yei yaklam yasuk yong ka HNLC hapyrdi iwon iwon i dawa neibhah kam ka jaitbru wa khian ym kwah wow yoo yei jia umsnaam.
Heijooh i por da kyntu leh ya ka HNLC wow yaichah ko wei ymtoh wow rai jhan wow dam noh yei yaklam yasuk.
Discussion about this post