U Secretary ka All India Congress Committee (AICC) uwa pait yaka Party ha Meghalaya, u Dr. A. Challakumar da kob u wa ka Congress daw wan uiñ biang hei bor ha Delhi wei kamjooh ha Meghalaya, deiwa ong leh wa kitu kiwa ong wa ka Congress toh ka lieñ kawa da ngam, kitæ hi ki wow wan yow yieñ laiñ yow psiah cha ka Party, deiwa ong wa nood u wow kob syndon yeini deiwa thoh.
Hawa yatoh wa i mih khubor wa em kiwa yahkhmat warim ka Congress kiwa kwah wow wan uiñ biang cha ka Party, neiliang u Challakumar da ong u wa ya kitu ki bru kiwa hap wow luti ym ye u wow klam katni, neibhah em ki hapyrdi kiwa da mih kiwa da tyrrah yaka seiñ nadien.
Da ong u wa neibynta kitu kiwa chaniah haka saiñpyrkhat yong ka Congress, ya kitu ka seiñ smat ko wow pdiang, wei neibynta kitu kiwa kwah myntoi hi-eh næ kiwa yoolut iyi iyi na ka Party, daw man iwa eh wow pynmankaam yeiwa kwah ki.
Hawa kylli hajrong i sñiawskem yong ka Party wow jop biang ha ka Election MP kawa daw man ha uni u snem, uni uwa yahkhmat ka AICC da ong u wa em kyrmen kawa skem wa ka Party daw jop ko ha waroh ar tylli ki MP Constituency, neibhah u MP wa katni na Shillong da leh u chiboon kiyi kiyi neibynta wow pynku yaka thaaiñ, kamjooh ka Congress da wanrah ko chiboon ki kaam pynroi ha kani ka jylla.
Discussion about this post