Ka National People’s Party (NPP) da beiñ ko ya u Dr. Mukul Sangma uwa yahkhmat ya ka Congress uwa da pynbaad wa ka sorkar jylla u Conrad K Sangma na ka NPP da kheiñstiñ ko wei da thok ko ya ki paidbah hajrong i dawa Inner Line Permit ha ka jylla.
Hawa yaklam wa kiwa pathai khubor, ki heh ka NPP wa kynthup ya u Working President ka National Youth NPP, u Nicky Nongkhlaw wa u President ka NPP Shillong City, u Anthony Nongbri da kylli ki wa iyi wa da leh u Dr. Mukul ya ka ILP heipor wa yahkhmat u ya ka sorkar heipor wa synchaar ka Congress ha Meghalaya wa ha Delhi.
U Nongbri da ong u wa ini i pynbaad u Dr. Mukul toh iwa khlem yurim neibhah kani ka kaam toh iwa nadooh u snem 1979, deiwa ong wa heipor u Dr. Mukul da chna ya ka High Level Committee wa da khlieh da u Symbood Montri Rangbah, u Bindo M Lanong, tangwa heipor wa ka Committee tyrwa ko wow pynkrehkaam noh ya ka ILP ha ka jylla, neiliang ka sorkar u Mukul won da kyntait ko wow pdiang ko yeitæ i tyrwa.
U Anthony da sympat-ktien u deiwa ong wa u Dr. Mukul wa ki MLA ka Congress wow liwan ki cha jar jiar ki Constituency yong ki yow pait yei sahdien yong ki.
Heiyatoh wa ka Meghalaya Residents Safety and Security Act (MRSSA), ki heh ka NPP da ong ki wa kani ka sorkar wa katni dang yaleh ko kammon wow pynmiat ya iwa da sdang ka sorkar u Dr. Mukul neibhah wa ka aiñ wa da pynkhreh da ka Congress dang em ko i duna wei neini i daw ka sorkar MDA dang kwah ko wow pynpliah ya kani ka aiñ.
