U Montri ka sorkar jylla uwa man leh u President ka PDF, u Banteidor Lyngdoh da ong u wa lada ka sorkar waka seiñ Hynñiewtrep National Liberation Council (HNLC) u chimkhia lang ki, da yooluti wa i klam yasuk ha kani ka kynti daw mankaam bait ym kam ha ki por kiwa da dep, kawa da dkut noh du chiteiñ.
U Banteidor uwa man leh u dkhot warim yong ka HNLC da pynsñiaw u yei sñiawkmen wa kam kiwa yahkhmat yong kani ka seiñ kieñ tiar da chim ki ya ka luti kawa biang wei kawa bha tam neibynta wow wanrah biang ya ka chongsuk chongsaaiñ hapoh ka jylla khamtam ha Ri Khasi Jaintia kawa ki krehkaam ki.
Da ong u wa i wan chakhmat yong ka HNLC daw man ko i myntoi wa khroo ya kiwa chong chnong wei khamtam wow ya imlang biang kam kawi ka imlang ka sahlang. Da ong wa iwa emkaam katni man ko wa ka sorkar wei kamjooh leh ka HNLC toh u chimkhia bha ya ini khnang wa i kaam u mankaam bait ha kani ka kynti.
U Banteidor da ong u wa neiliang yong oo daw kyntu lang u ya ki para Montri ka sorkar wei leh ya ki MLA wow ya chimkhia lang wow pynsmat ya ini i kaam, wei wow thung noh ya u ksiang khnang wow yoh sakhi biang sa chisien ya i chongsuk chongsaaiñ hapoh ka jylla.
