Shillong: U Montri Rangbah ka jylla u Dr. Mukul Sangma da ong u wa ka sorkar ym jooh pynman tamasa ko tangwa ka kyrchaan ko ya ki seiñ wa pynman ya ki tamasa. Ya ini u Dr. Mukul da ong u ha yung dorbar hajrong iwa da kylli u MLA ka Nongkrem u Ardent M. Basaiawmoit ynne ka sngi, uwa da kylli waka sorkar jooh pynman tamasa næ ym jooh em.
U Montri Rangbah da ong u wa ka sorkar jylla da kreh lang ko wa ki bor district waphær waphær wei ha u snem 2016-17, ka sorkar da pyllut ko T. 1,18,06,200 ha ki kaam tamasa ha ka jylla.
U Dr. Mukul da ong u wa ya kini ki tamasa da kyrchaan poisa da ka sorkar katkam i paan yong kiwa pynman deiwa pynchong yurim katkam i emkaam yong ki. Ka District Arts Society kawa khlieh da u Deputy Commissioner ka pait ko yei paan poisa yong ki seiñ wa pynman ya ki tamasa ha ki district yong ki.
Da ong u leh wa kiwa kwah u pynman ya ki tamasa ki haap u thoh application ki cha u Deputy Commissioner yow yoh bor ki.
Neiliang u Ardent da ong u wa ka sorkar toh u booh ko ya ki kyndon aiñ kiwa biang lada e bor u pynman tamasa neibhah boonsien ki tamasa kylla ki cha ki kaam wa pynjah burom neidaw ka dih kyaid, wa ki kaam wym ye u pdiang wa jia ha kini ki tamasa.
Da kyntu u ya ka sorkar wow bichaar bniah bha ko ya kini ki tamasa heiwa u Montri Rangbah da kular u wa ka sorkar daw pait wei daw bichaar ya ki bynta wa yatoh wa ini waroh.
Discussion about this post