U Montri Rangbah warim ka jylla uwa man leh u heh ka Congress Legislature Party ha ka jylla, u Dr. Mukul Sangma da ong u wa u Montri Rangbah, u Conrad Kongal Sangma toh u suki u kiaw hawa da thung ya ka takit hajrong iwa ha i step ka 13 tarik ha Mawlai Kynton Massar.
Da ong u wa ka sorkar ymtoh u yada ko ya ki pulit hajrong i chah siat yap u heh warim ka HNLC, deiwa pynrap leh wa lada ka sorkar thung ko da ka takit wa laitlooid, u Conrad leh toh u yang u hadooh wa dep i takit wow tip neiyi i daw wa da poi hadooh uni u pood.
U Dr. Mukul da ong u wa kamwa yoo katni ka sorkar pynkut bait ko deiwa ong wa ya iwa leh ki pulit haka 13 tarik iwa man iwa toh.
Chooh chooh da ong u wa emkaam wow tip yi wa pait ya ini i jia wei ha iwon i rukom jia i, lada leh deiwa yoh hukum næ lada jia i na kiwi ki daw wym yohsa.
Ha iwi i liang u Mukul da ong u wa waroh toh u tieñ ki ya ka aiñ, wei lada em kiwon kiwon kiwa da knieh ya ki tiar siat ki pulit, ka sorkar toh u thooh ko kiyi kitæ, tangwa phylla wa u Conrad da kyrpaad da khroh pathan u wow pynuiñ ya ki.
Da ong u wa toh i kaamram u Montri Rangbah, wow pyntikna wa yoh biang ya ki tiar siat wa da chah knieh, wei toh u tip u kiyi wa leh næ emkti tangwa yoo kamwa ym kitkhlieh u yeini wei kwah u du wow em ha ka chuki.