Ka JSU hadien wa da yoo ko ya ka khubor wa neiliang u Himanta Biswa Sarma, Montri Rangbah ka Assam da ong u hapoh ka yung dorbar chna aiñ ka Assam wa ka chnong Mukroh dang haap ko hapoh Assam, neiliang ka seiñ da ong ko wa ini i klam u Sarma da pynchrai ko ya ka seiñ wei khamtam kiwa chong chnong Mukroh wa ki paaid ka bri u Ynñiawtrep hi waroh kawi.
Ka seiñ da phah ko ya ka kyrwoh cha u Montri Rangbah ka jylla, u Conrad Sangma wow yaklam wa u Montri Rangbah ka Assam wa ymtoh wow klam u katwa yoh hi-eh deiwa kam ya ki chnong wa ki thaw wa em hapoh Meghalaya kiwa em ha khappood wa ka Assam.
Ka seiñ da ong ko wa ini i klam u Himanta daw nang e diñ chooh chooh wei daw wanrah yei yaphær jaitbru sa chisien hapyrdi ki nong Assam wa ka jylla Meghalaya.
Ka seiñ da phah ko leh ya ka kyrwoh wa che kdar cha u Montri Rangbah ka Assam wa toh u tih yillu chwa yow tip u yei sakhiat ya kiwon ki thaw wa haap hapoh kawon ka jylla chwa wow klam u hapoh ka dorbar neibhah daw yah bakla ko ya kiwi kiwa mihkhmat ka Assam.
Da ong leh wa u Sarma toh u tip che u wa ka chnong Mukroh haap ko hapoh i pait ka JHADC wei ya ka synchaar khadar leh da yoh bor na ka JHADC ym toh katkam wa kam u Montri Rangbah ka Assam wa haap ko hapoh ka West Karbi Anglong District.
U Himanta Biswa Sarma ynne hawa jubab hapoh ka Assam Assembly yeiwa kylli u Bidya Sing Engleng, MLA ka Diphu Constituency da ong u wa ka Mukroh em ko hapoh ka West Karbi Anglong District, Assam.
Ha kiwi ki por won u Himanta da jooh ong u wa ka Mukroh toh kawa em hapoh Meghalaya wot ha ki Cabinet Meeting ka Assam.
Hapoh ka yung dorbar da khana u leh wa iwa jia ha ka 22 tarik u Khonchonglad, 2022 toh neidaw ki kaam khayi dieñ tooh wei ym toh neibynta u pood wei i siat ki pulit toh yow yada ki ya idæ hadien wa em ki bru na Meghalaya wa da tba kti wei tynyap ki ya u Forest Guard ka Assam, u Bidyasing Lekthe.
