Jowai: Ka seiñ ki MDC warim ka JHADC wa tip kam ka Jaiñtia Hills Autonomous District Council Ex-MDC Forum, hawa klam wa kiwa thoh khubor ynne ka sngi hajrong i dooh tulop ki wakreh ka Council kattu la kamwa 8 bnai, da pynsñiaw haroh ki yei e kyrchaan wa pura hajrong i sangeh lai kreh wa khlem booh por ki wakreh yong ka Council iwa da sdang nadooh ka 16 tarik uni u bnai, deiwa ong wa lada ki wakreh ye hi ki mo u lai kreh khlem baam wei ye hi ki mo u im khlem baam.
“Kam ini ym jooh jia i heipor wa i man i kam kiwa mihkhmat wa ki wakreh u dooh tulop ki hadooh da 8 bnai, wei i kam ki bru wa jooh chakri yaka Ri-loom Jaiñtia sñiaw i wow e i kyrchaan wa pura yeini i sangeh lai kreh ki wakreh ka JHADC,” ong u S. Mulieh, President JHADC Ex-MDC Forum uwa jooh man leh kam u CEM warim ka JHADC.
“Dang heini wa dep u Thombor Shiwat CEM ka JHADC da khana u haki laad pathai khubor wa kamwa T. 98 klur ka Council daw yoh ko naka sorkar jylla hapoh i yahkhmat u Conrad Sangma kam u Chief Minister, tangwa iwa phylla ya i ki MDC warim wa kammon kani ka Party NPP wa yahkhmat yaka sorkar nadooh ka sorkar jylla, hadooh ka sorkar JHADC wym em ko i bahkhlieh wow pynlait ya katai ka poisa wa T. 98 klur,” pynrap u S. Mulieh.
Da e nongmuna haroh u deiwa ong, wym ye u len yei sakhiat lada pait heiyatoh waka sorkar pyrdi wa yahkhmat da u Narendra Modi kam u Prime Minister, neibhah hawa pynbna u yaka Lockdown wa waroh hap chong yung yow yada na u COVID-19, da e kyrchaan poisa haroh u cha kiwa khih mylla sngi yow im ki, tangwa kammon won ka sorkar jylla dang ksoh bait ko ya katai ka poisa khlem da pyrkhat yei eh i jynjar ki wakreh.
Ki wakreh lai kreh ki man-ka-sngi, tangwa ki won wym em ki i sñiaw neibynta ki wakreh ka Council wa kammon u im ki, kammon u lai kreh ki khlem baam? Kammon u kyrchaan ki yaki khon ki kti heiliang i baam i dih i puræ puthi wa kiwi kiwi wa emkaam.
Da kylli haroh ki wa kammon kani ka Executive Committee heiwa waroh ki MDC kyrchaan ki yaka sorkar NPP hapoh i yahkhmat u Thombor Shiwat kam u CEM wei ym sñiawthooh de ki, pynneh bait ki ya kani ka sorkar wa yahkhmat da u Thombor hajrong wa yoo ki wym ye ko u su wot tang yaka tulop ki wakreh.
Kamtæ booh ki i kyrpad ya u Chief Minister ka sorkar jylla u Conrad Sangma wa ka Cabinet khamtam ware ya ki MLA na Ri-loom Jaiñtia wa toh u pyrkhat ki neibynta u pynlait ya katai ka poisa kawa toh ka hok yong ka District Council khnang yow yoh tulop ki wakreh.
Kam wow kdaw heini wa ki MDC warim wa kynthup hapoh kani ka Forum em ki 59 ngut wei hawa yaklam cha ki laad pathai khubor ynne hajrong kani ka daw bah yong ka District Council, da emlang leh u Assistant Secretary, JHADC Ex-MDC Forum u C. Garod u MDC warim ka Nangbah, u Treasurer u Planning Rymbai MDC warim yong ka Musniang Rngad.
