Ka Hynniewtrep Youth Council (HYC) hadien wa da booddien bha da ka RTI yei kaam wa yatoh yow kyrriah yaki bru wa sah ha Them Metor, da chem wa em du 195 tylli ki manyung kiwa em hok wow sah Quarter sorkar kiwa kreh sakhiat ha yung krehkaam ka Shillong Municipal Board (SMB).
Neiliang ka HYC da lai ko yow pynsñiaw yeini ynne ha u Symbood Montri Rangbah, u Prestone Tynsong uwa man leh u Chairman ka High Level Committee (HLC).
U President ka HYC, u Roykupar Synrem da khana u wa neiliang u Symbood Montri Rangbah da pynsñiaw u yei lyngngoh wa em du 195 tylli ki manyung neibhah katkam ka yukheiñ wa da e cha ka sorkar da ka cnat Urban Affairs da ong ki wa em 342 tylli ki manyung kiwa ka sorkar daw kyrriah ko na katai ka thaw.
Ini i lai ka HYC wow yachem ya u Prestone toh hadien wa da tip wa ka sorkar daw chong ko yaka yalang wa khaddooh wa ki bru ka Harijan Panchayat Committee (HPC) ha ka 7 tarik u Naisan wow wan.
U Synrem da pyntip u leh wa neiliang u Symbood Myntri Rangbah da chimkhia u ya ini i kaam wei da kular u wow khut smat yaka chnat wa pait ya ini i kaam yow paan pynche.
Hawa kylli hajrong i wan tuklar yong ki bru wa na baar yei pynbait ya ini i kaam, uwa yahkhmat ka HYC da ong u wa ini toh i kaam yong ka jylla, wei ki bru kiwa na baar ymtoh u tuklar ki wei u Symbood Montri ymtoh u ap u yeiwa e buit kini ki bru wei lada ap, pynyoo wa ka sorkar tlot bha ko.
Discussion about this post