Ynnin ka 6 tarik da em wa siat yaka Gate wow psiah cha yung u Home Minister ka Arunachal Pradesh u Bamang Felix iwa em ha nongbah Itanagar. Ini da jia i heipor 10 waje i step heiwa da em wa siat ar kuli tangwa ha ini i por wa jia, u Minister ym em u ha yung.
Heiyatoh wa ini, ki pulit da kem ki ya uwi u bru wa em 47 snem i rta uwa da tipmit kam u Thomas Gangte Tadap uwa da chah kem na Itanagar hi wei toh uwa na Sangram, Kurung Kumey tangwa sah u ha Lobi, Itanagar.
Ki pulit da chemdien ki ya uni u bru deiwa pait yei riñ ki CCTV heiwa da yoo wa uni u bru da pynemkaam u da ka .22 Rifle wei da mih u napoh kawi ka kari Celerio kawa em ya u Number AR-01Z-6941.
Kamtæ ki pulit pyn ynnin da pynsangeh kari ki ha Chimpu heiwa da yoo ki ya kawi ka kari ka wym em Number Plate kawa hap ki wow kdong heiwa da yoh wow ksoh ka ha Chimpu-Jollang Road heiwa da kem ya uni u bru.
Napoh ka kari da chem leh yaka.22 Rifle kawa da pynemkaam yow siat wa ya kawi ka wait.
Katkam wa pyntip ki pulit, uni u bru da phla u yeiwa leh u wei da tip leh wa uni u bru toh uwa kyrchaan ya u Minister tangwa da leh u ya ini neidaw wa muaid u.
Chooh chooh dang pynman yaka takit yow tip tre yei daw wa siat uni u bru.
