Ka bru kawa na Guwahati wa tip kam ka Bhabana Sharma, ya kawa da chem na Shillong, da klam ko ha Social Media heiyatoh wa ki daw wa yut ko na katai ka sorbah toh nei khia i bor pyrkhat yong ka.
Da khana ko wa da yut ko dei mon yong ka samen ha ka 24 tarik u April wei ym em kiwi kiwa emkti wa ka wei da leh ko yeini samen.
Ka Bhabana da khana ko wa da mih ko na Jalukbari cha Paltan Bazar wow lai cha Shillong heiwa da pynche ko wa i Message wa phah ko cha ka bei ko wa em ko hei maa toh iwa bakla tangwa nei khia i bor pyrkhat donhi.
Da khana ko wa dapoi ko ha Shillong samen wei da ye wow pynsakhiat da ki Video CCTV ha ka Hotel wa lai sah ko wei heini i por da man ko kawa kulmar bha wei ym ye ko u pyrkhat deiwa miat heiwa da pyrkhat ko wot wow pynkut yei mynsien.
Chooh chooh hei step da paan yarap ko na kawi ka bru wow Phone cha ka bei ko wei hadien ini da liwan ko cha yung dei yarap ki pulit ka Assam.
Da phla ko wa jooh ya maya ko wa u bru wa tip kam u Nihar Jyoti Sarma la ar snem uwa da maham pyntieñ ka wa lada ieh ko oo daw pynlait paidbah u ya ki dur wa ki Video yong ka, kamtæ da im ko hei tieñ.
Da khana ko leh wa da ujor ko ya ka FIR heiyatoh wa ini heiwa da krehlang ko hei takit ki pulit.
Heijooh i por da kyntu ko ya ki paidbah wym toh u pyrkhat ki deiwi næ wow pynpoor ya ki khubor hamsaya neibhah kam ha ini i por ka yung yong ka leh lai ki ka luti wa chitom, deiwa kyntu ya kiwi kiwa maad kamni wow klam wei wow paan yarap.
Puræ leh: Ha Shillong chem ya ka kynthai wa wiar na Guwahati
Discussion about this post