Ki paidbah wa chong chnong ka Par Umkhen deilang ka chnong Nonghali wa ki chnong wa marjan, da ya mih paidbah ki khrui ynne i step ryngkat i rah Placard yow khanglaad ya ki bor sorkar wow pynman Public Hearing ha Nonghali neibynta wow wanrah ya ka Waste Management Plant (i thaw noh jhep) ha Lum Sohlait.
Kini ki chnong toh kiwa haap ha khappood ka East Khasi Hills, West Jaintia Hills wa ka Ri-Bhoi District wei da yahkhmat ya kani ka yakhih da ka Synjuk Ki Nongsynshar Shnong ka Par Umkhen ryngkat ka Nonghali.
Ki paidbah nadooh i por step da mih ki yow khangluti ya u sarok da ki moo wa ki dieñ hapoh ka chnong Jaroid iwa man i thaw chwa wow poi cha ka thaw wow pynman ya ka Public Hearing ha Nonghali.
Kani ka Public Hearing toh kawa da booh yow pynman da ka Meghalaya State Pollution Control Board (MSPCB) neibynta wow chna ya ka Waste Management Plant ha Lum Sohlait kawa haap hapoh ka chnong Nonghali.
Ki paidbah da yalum ki khrui ha sarok yow khang luti syndon ya ki bor ka MSPCB, ki Magistrate wa ki pulit yow hiar cha ka chnong Nonghali.
Da ong ki wa nadooh wa sdang leh da dep ki wow phah chithi cha ki bor sorkar yow pynsñiaw yei pyrchah ya kani ka kaam tangwa hadooh kattæ leh ki bor sorkar ym em da jubab ki ya ka chithi wei da thmu wow pynman dei bor ya kani ka Public Hearing.
Kani ka thaw toh kawa da jied yow man kam ka thaw thymme heithaw ka Marten kawa man ka thaw noh jhep neibynta ka Shillong.
Discussion about this post