15 49.0138 8.38624 1 0 4000 1 https://wyrta.com 300 0

Khanglaad ki paidbah ya u Pandit thymme ka Jayantee Mandir wow chim yei kaam yong oo ha Nartiang

0 Comments
Advertisement ad1

Jowai: Ka kynrum kynram hapyrdi ki arliang ki paid wa leh niam Puja ha chnong Nartiang, West Jaiñtia Hills District dang pteiñ hi heiwa da yaknieh Pandit wow leh niam ha ka Jayantee Mandir ha Nartiang kawa da pteiñ katu da boon taywa heiwa da pyrchah ya u Pandit wa jied da u Dolloi ka Nartiang wa uwa hiar pateiñ na u Pandit warim kani ka Mandir.

Kani ka kynrum kynram yong ki arliang mamla da poi ko chadooh ka yung bichaar ka jylla kiwa da phah wow pyn ya suk noh tangwa hadien wa dep wow pynman ya ka yalang hapyrdi ki arliang leh ym em poi ko cha ka sniawthooh wow hunlang waroh.

Ynne ka sngi won u Dy SP M. Marngar, ka E. Mawlong EAC deilang wa ki pulit ka District heipor chiteiñ sngi da mut ki wow yah ya u Pandit wa da jied da u Dolloi deilang wa mynjur ka Ram Krishna Mission u Pandit Swapon Bhattacharjee wow psiah cha ka Mandir tangwa ki paidbah wa pyrchah ya oo wei ym e laad ki wow psiah u chapoh ka Mandir.

Kam wow pynkynmoo kani waroh da sdang ko hadien wa arngut ki Pandit lehniam warim u Molloi Deshmuk wa u Uttam Deshmuk da khlaad noh ki wei ha u snem 2017 wa u Wisu (March) uni u snem wei kiwa chong chnong won da kwah ki u man Pandit wa thymme u khon u Molloi uwa da kha na ka kynthai Pnar u wow man kam uwa hiar pateiñ uwa tip kam u Oni Muskut uwa na kani ka chnong wei da pyrchah ki ya u Bhattacharjee wa jied da u Dolloi waka Ram Krishna Mission.

Ki paidbah wa kynthup ya ki manbei da ong ki wa ha chwa wow jied ya u Pandit wa thymme kiwa pynlai ka Mandir kamjooh ki paidbah ym tip ki iyi iyi leh hawa da em chwa i panbait yong u warim wajah ha kani ka chnong.

Sa iwi leh da ong wa u Pandit wa thymme ym tip u wow pynlai ya ka niam ka rukom neibhah ym tip u ya ka riti dustur wa da yah kiwa rim wa jah.

Kamtæ hadien ini waroh ki bor district ki mada yoo ki wa ym ye u pynsniawthooh ym poi ko cheiwon cheiwon da mih ki na kani ka thaw wei da khut biang ya waroh ki arliang wo wan yaklam ki.

Advertisement ad1

0 Comments

Leave a Reply