Shillong: Ka Meghalaya Football Association (MFA) da pynbna ko wa da sdang ko yaka Volunteer program neibynta ka samoi wa thymme ka Meghalaya Baby League (MBL) wa kiwi ki jait yalehke wa daw pynman ka MFA kamtæ da khut ya kiwa kwah wow embynta lang kam ki Volunteer wow wan ki chakhmat.
I thmu kani ka Volunteer program toh wow e laad ya ki Volunteer kiwa ym pu em kreh yow yoh laad ki u maad yei kreh ha ki sngi wa kut ka tayaw yow man ko leh kam ka e sikai ya ki wow pynbniah yei sap yong ki wow kreh. U man leh kam wow pynkhreh ya ki yow yohlaad ki wow embynta ha ki yalehke Sport wa boonjait.
Kamwa man kattæ emkaam 60 ngut ki Volunteer wei kiwa em yumut ye ki wow thap yaka Application haka yung krehkaam ka MFA (ha ki por wa man kreh lait noh haka sngi Bibar) kawa em ha Jawaharlal Nehru Stadium, Polo, Shillong wei ye leh u phah da ka email ha [email protected], hadooh ka 30 tarik uni u bnai.
U chah du ya kiwa em 18 snem chaneiñ wei daw jied ya kiwa ym pu em kreh wei 30% da booh kyrpang neibynta ki kynthai.
Ya kiwa chah jied daw yoh ki ya ka Certificate manda kut kamjooh ki t-shirts, i bai lai bai wan wa i baam ha ki sngi wa kreh ki.
Discussion about this post