Jowai: Kam wa da yoh u sakhi ha kini ki sngi wa ka sorkar India hei yahkhmat u Prime Minister u Narendra Modi da yaklam yatuklar ko yei eh i khoo wa mih neidaw i pynemkaam ya ki Plastic ha waroh ki liang iwa daman i tynjooh wakhroo ya ka imlang sahlang kamjooh ya ka chnong ka thaw ha kylleiñ ki bynta ka ri India.
Kamtæ hajrong ini i eh i khoo wa mih neidaw yong ka Plastic ka School Managing Committee yong ka Dorbar Chnong Chilliangraij chibynta i lehkmen Centenary Celebration yei Yung Walieh, ha kani ka sngi Mulong 30 tarik Naikhynde chirup wei yakrehlang wa ka Centenary Celebration Committee da chim ki wow pynman ya ka Inter School Drawing-Painting, Debate wa ka Quiz Competition ha Yung Walieh.
Ha kani ka yakob dawan wow ya chimbynta da ki skur wa kynthup ya ka Loompyrdi Iongpiah LPS SSA, Pohmusiang Govt. LPS, Khimusniang Govt. LPS, Seiñraij Govt. LPS, Chilliangraij Govt. LPS, Little Flower LPS SSA, Loompyrdi Iongpiah UPS SSA, Pohmusiang UPS SSA, Little Flower UPS SSA, Seiñraij UPS, Chutwakhu Govt. LPS wa ka Chilliangraij UPS SSA.
Hei pynyoo pyntaw sap ki khynnah skur ha ka yakop dro hajrong ka phang wa ong “Save mother Earth- Plastic Free India” da sakhi kiwa ya chimbynta kat kam i sñiaw wei yoo yong ki da yaleh ki wow pynwandur yei rukom dro dur iwa yoosuk wei chon yumut kat kam ka phang. Neitæ won ha ka Debate hei ktien Pnar wa ong “Ka Plastic ktah bha ko ya ka Rymaw” heini leh kiwa ya chimbynta da yaleh ki u pyntaw nia katkam ki yurim wa yoo wa chem ki iwa e myntoi ya ki wa wan sakhi.
Ha ka yalang pynkut yong kani ka prokram hei pynlai u C.W. Niangti, Chairman Organising Committee Centenary Celebration da emlang leh ka M. Pde, Retired DSEO West Jaintia Hills District wa ka G. Pde, Retired DSEO, East Jaiñtia Hills District hei wa da yoh yei klam na u Oriland Shylla, Secretary Organising Committee Centenary Celebration uwa da batai pynsñiaw yei mut yong kani ka prokram kamjooh ki kyntien khublei na ka Handakaru Iakai, Head Teacher, Chilliangraij UPS SSA.
Ka G.Pde hawa e kyntien ha kani ka prokram ong ko ya ki khynnah skur kynmoo i chimbynta toh iwa emkaam ha kiwon kiwon ki yakob ymphær lada jop næ lada rem neitæ e mynsien ko leh ya ki khynnah skur wow man ki ki khynnah kiwa em itæ i mynsien yaleh neibhah kani ka juk ka por toh ka juk yong ka “Competition” ha waroh ki liang wei emkaam bha u kreh chitom u pynjanai yei tip wei sap i phong iwa u Blai Trekirot da e u ha phi.
Ki khynnah skur kiwa da jop ha kani ka yakob toh man ki kamni, hei yakop dro dur kat kam ka phang wa ong “Save mother Earth- Plastic Free India” ha ka kyrdan Lower Primary Level dajop da u Salanmi Passah yong ka Chilliangraij Govt. LPS bood ryngkhi ka Sakani Shylla yong ka Chutwakhu Govt. LPS waka Cheba Najiar yong ka Loompyrdi Iongpiah LPS SSA katwa yong ka kyrdan Upper Primary Level won da jop da u Wankitbok Passah yong ka Loompyrdi Iongpiah UPS SSA bood ryngkhi wan u Ruhimi Shadap Passah yong ka Pohmusiang UPS SSA wa u Luckystar Kam yong ka Loompyrdi Iongpiah UPS SSA.
Hawa khyruiñ won ha ka Debate næe yakob pyntaw nia hajrong ka phang wa ong “Ka Plastic ktah ko ya ka Rymaw” yei naam Best Debater da yoh da u Dajied Lanong yong ka Chilliangraij UPS SSA bood ryngkhi wan u Waki-o Kyndiah yong ka Loompyrdi Iongpiah UPS SSA wa ka Dakani Ryngkhlem yong ka Pohmusiang UPS SSA, katwa heiliang wan ka Quiz yei naam jop da rah da ka Little Flower UPS SSA bood ryngkhi won ka Seinraij UPS waka Chilliangraij UPS SSA.
Discussion about this post