U Symbood Montri Rangbah uwa pait leh ya ka Kaam Pohyung ka jylla, u Prestone Tynsong da kyntait u wa em i pynkhai im biang ya ka GNLA wei ini toh hadien wa ki pulit ka South West Khasi Hills da yoh kem ki ya 5 ngut ki bru wa dawa poisa deiwa kam wa ki toh na ka seiñ kieñ suloi ka Garo National Liberation Army Regroup (GNLA-R).
Hawa klam ynne ka sngi, u Prestone da ong u wa kiwa chah kem ymtoh ki dkhot ka GNLA wei ym em itæ i pynkhai im biang ya kani ka seiñ, heiwa da ong chooh chooh u wa ki 5 ngut kiwa da chah kem man ki du kam ki damok kiwa kwah wow leh ki kaam pyntieñ bru.
U Prestone da maham u leh wa ka aiñ ym maap ko ya kiwon kiwon kiwa leh ya ki kaam pyntieñ.
Hawa kylli da ong u wa kamwa man hadooh kattæ ym em i khai im biang ki seiñ kieñ suloi hapoh ka jylla wei lada kammon kammon jia wa em ki, ka sorkar leh da pynkhreh ko wow lai katkam ka aiñ.
Kam wow pynkynmoo wa ki pulit ka Ranikor Circle wa ki Special Cell na Mawkyrwat ha ka tayaaw wa dadep da kem ki ya 5 ngut ki bru wa dawa poisa hei pyrtuid ka Garo National Liberation Army Regroup (GNLA- R) wa kynthup ya uwi uwa dang hapoh 18 snem i rta.
Kiwa da chah kem toh kiwa tip kam u Mann R. Marak (25 snem) na Upper Rajapara, South West Khasi Hills, u Marson R. Marak (18 snem) uwa na Upper Rajapara, South West Khasi Hills, u Tartus N. Marak (20 snem) uwa na Mulapat, South West Khasi Hills wa u Babulin D. Sangma (27 snem) uwa na Upper Rajapara, South West Khasi Hills.
Discussion about this post