Ka yung bichaar ka Addl. DC (Judicial), Shillong hawa pait yei yaleh jamin namo ka Bail Application ka Sonam Raghuvanshi kawa da chah kem ha ka 09-06-2025 na Ghazipur, UP heiyatoh wa i chah pynyap u Raja Raghuvanshi wei da em ko hapoh patok ha Shillong da palat 10 bnai wei neiliang ki bor ka aiñ dadep ki wow Charge Sheet ha ka 05-09-2025 heiwa ka Sonam da yasaaid ko deiwa ong wym emkti ko heiwa chah pynbaad ko.
Wei na ki 90 ngut ki pyrtuid kiwa da pynmih kam kiwa sakhi dadep wow kylli takit ya ki soo ngut wei ini waroh toh iwa ye wow chimpor u pyndep wei i bichaar yeini i kaam kattu da sahkut i la ar bnai.
Kamtæ da ong wow kset ya kawa chah pynbaad khlem da em i bichaar (Trial), da em hok ko wow yoh jamin.
Neiliang u muktiar ka Sonam da ong u wa u kset bait ka da man ko pyrchah ya ka aiñ najrong wa ki pulit ym em bood ki ya ki kyndon manda kem ka iwa man pyrchah ya ka Article 22 (1) ka Constitution ka India.
Da ong leh wa kiwon kiwon kiwa chah pynbaad dang man hi ki kiwa hok kat wym pu em rai pynrem ki wei da em hok ko wow yoh jamin deiwa e daw wa ka toh ka wym jooh em leh kiwon kiwon ki kaam pyrchah aiñ wei ym man ko leh ka bru kawa daw yut deiwa kular leh wa daw kohngooh ko ya ki kyndon wa da booh hawa yoh jamin.
Neiliang won u muktiar wa yaleh pyrchah ya ka Sonam da ong u wa ym ye wow pdiang yei paan jamin neidaw wa da em ka Chargesheet wei i e daw wa ym em biang ki kot ki sla deiwa klem Tick ya ki Check Box toh iwa bakla donhi.
Ka yung bichaar da ong ko wa hawa kem ya kiwon kiwon hap wow khana ya ki yei daw wa kem ki deiwa sñiawthooh ki deiwa pynemkaam leh da i ktien wa tip ki. Lada kiwa chah kem won ong ki wym em bood katkam ya ki kyndon manda chah kem pynyoo wym em bood ya ka Article 22(1) wei lada ym bood yeini da man ko wa da tyngkheiñ yei hok manbru namo ka Fundamental Rights.
Wei manda wanrah ya kiwa chah kem hakhmat u Judicial Magistrate man ko i kaamram u Magistrate wow pyntikna wa da bood ya waroh ki kyndon wei lada ym bood ya ka kyndon wei lada tyngkheiñ ya ka Article 22(1), da man ko i kaamram ya ka yung bichaar wow e jamin ya kiwa chah kem.
Da kdaw leh wa hawa pynyoo ya ka kot ka sla wa da thoh ‘Intimation of grounds of arrest’ heiwa da leh heidur ka Checklist wow pynyoo iyi wa da chah pynbaad tangwa ya kini ki Checklist Box ym em da Tick ki yow pynyoo ha kawon ka kyndon wa da chah pynngat ki iwa mut wym tip kawa chah kem hapoh kiwon ki kyndon wa chah kem ko.
Tangwa hanla ong toh iwa bakla (Clerical Error) ym em leh kawon ka kot ka sla wa pynyoo ha kawon ka kyndon wa da kem ya ka Sonam iwa mut ka leh ym tip ko yei daw wa chah kem ko.
Najrong ini, ym em leh u muktiar wa emlang wa ka heipor wa wanrah ka ha ka yung bichaar wa em ha Ghazipur heiwa ka ym em yoh laad ko wow yasaaid.
Kamtæ deiwa pait yei rai yong kiwi ki mukotduma kiwa sariem wa ini wa jooh, da e jamin ya ka Sonam deiwa booh kyndon wym toh u yut ko, u lai tuklar ko heiyatoh wa ki sabut deilang kiwa sakhi, toh u em ko hakhmat ka yung bichaar ha kawon kawon ka tarik wa da booh, ymtoh u mih ko cha baar u pood ka yung bichaar klem da yoh bor wei wow booh ya ka Personal Bond kawa Rs. 50,000.
Discussion about this post