U MLA ka Khliehriat uwa man leh u Montri ka chnat Social Welfare ka jylla, u Kyrmen Shylla ynne ka sngi da ong u wa oo katkam wa man hadooh ynne ka sngi da yoh u yei stat wa ini i kyrdan toh du lyngba u mooyong, wei ya ini da ong u ha ka yalang lehwarom World Tourism Day wa da pynman ynne ha Moopun, Mutong, East Jaiñtia Hills.
Da e nongmuna u leh wa ki Doctor wa ki Engineer na East Jaiñtia kiwa da yoh u da lai puræ toh lyngba ka poisa wa mih na u mooyong wei lada toh du nei rep i riang tæ daw dap du wow baam baam donhi.
Chooh chooh da ong u wa katni da boon ki bru wa da lai chaphrang, kiwa da man sahep wei ini leh toh nei kyrchaan u mooyong wei em ki ar bynta ha u mooyong, iwi toh wa pynsih u ya ka rymaw wei iwi won toh wa yarap pynku u ya ka imlang sahlang wei toh i kaamram yong i ki bru kammon u pynman salonsar (Balance) hei wow yoh myntoi wei kammon wow yada ya ka rymaw.
U Kyrmen da ong u leh wa katni da man iwa sñiawkmen wa hapoh ka sorkar MDA da ye ki bru wow kamtre ym du ya i thaw tangwa wot ki mar wa em chapoh khyndaw leh kamjooh.
Heijooh i por uni u Montri da ong u wa kattu wa da em 3 tylli ki Block wa da yohbor (License) wei dang yang ka Mining Plan wow tih biang ya u mooyong wei neiliang ka sorkar daw yaleh ko wow yarap ya ki wow imja biang sa chisien wei ym kwah de wow pynsih wei wow ktah ya ki thaw uiñke (Tourist Spot) neibhah wa ka thaaiñ San Chnong toh kawa ku bha chaphrang wei manda khih mooyong ym toh u ktah ya ki thaw uiñke wei ya kiwi ki thaw ye u pynemkaam yow seiñ kam ya ki karkhana.
