U Montri wa pait ya ka chnat Kaam Pohyung (Home) hapoh ka jylla, u Lahkmen Rymbui da ong u wa ym em itæ i ya sñiaw yaphær jaitbru ha i jia chah dat wa da jia ha ka 20 tarik wa 24 tarik uni u bnai.
Da ong u em ki bru kiwa thmu wow e rong da i yaphær jaitbru ya iwon iwon i jia, iwa da man iwa sih bha, wei pynrap u wa kam ini i jia da jia ha man ki thaw, tangwa ym tip ileh wa ha ha Meghalaya ya kam ini i jia da sdang wow e rong pynyaphær jaitbru.
U Montri da ong u leh wa lada e rong pynyaphær jaitbru ya iwon iwon i jia, da man kamwa e thaw rieh ya ki damok wei wow pynchlur ya ki wow leh ya ki kaam sih wa ktah yei suk i saaiñ ha ka jylla.
U Rymbui da ong u wa ki pulit dang booddien wei pynman ki ya ka takit hajrong i jia chah dat ha ka thaaiñ Lumdiengjri iwa da jia ha ka 20 tarik wei kamjooh ya i chah dat wa jia ynnin ka sngi ka 24 tarik ha Mawkhar heiwa 4 ngut kiwa kreh mylla da chah dat ki ha ki bru wym ye u tipmit.
Katkam wa pyntip u Rymbui, i jia ha Lumdiengjri, ki pulit da yoh ki yei ujor, katwa iwa jia ynnin ka sngi ym pu yoh ya i ujor, tangwa ki pulit da pynman ki ya ka takit wow chem ya ki damok wa emkti.
Hawa kylli, u Montri da pyntip u wa hadooh katni ym pu em yoh kem ya ki bru wa emkti, tangwa da ong chooh chooh wa toh i kaamram yong ki pulit wow pait ya kam ini i jia ym pteiñ ki, wei ha i jooh i por da kyntu u ya ki paidbah wow e yei krehlang wa ki pulit yow chem ya ki damok neibynta wow pynnneh ya i suk i saaiñ ha ka jylla.
