Ki MDC ka NPP ym embynta ki wow rah cha ka yung bichaar ya ka soskular pynbait pood: Conrad

U Montri Rangbah ka jylla u Conrad K Sangma, uwa man leh u President ka National People’s Party (NPP) da ong u wa i rai yong ka Khasi Hills Autonomous District Council (KHADC) wow lai choh dwar ka yung bichaar toh iwa chim da ki kattu katni.

“Nga khana O wa ki MDC yong ka NPP ym em da embynta ki wow chim ya kam ini i rai, tangwa toh iwa da leh da ki kattu katni ki bru samen wow klam wa ki daw rah ki ya ka kaam yasoi soskular cha ka yung bichaar,” da ong u Conrad hawa klam ha ka yalang yong ka ki khynroo wa pynman da ka National People’s Youth Front (NPYF) ha U Soso Tham Auditorium, Shillong ynne ka sngi.

U Conrad da ong u wa kwah u leh wow pyntip cha kitu ki bru samen kiwa da klam hajrong katai ka rai wa ki da embynta ki hawa yatai hajrong i kaam pynbait pood wei ileh wa katni won da pyrchang ki wow chim kabu saiñ pyrthai hajrong i long i man yong kani ka kaam.

Katwa hajrong i pynbaad ka Liang Pyrchah wa ka NPP da thok ko ya ki paidbah wa chong chnong hajrong i ya pynbait pood hapyrdi ka Assam wa Meghalaya, uni uwa yahkhmat ka NPP da ong u, “Lada toh i thok i ya ki paaid chong chnong ka jylla, ki bru ym toh u mih ki na ka seiñ yong ki yow wan psiah cha ka seiñ yong i. Ka Liang Pyrchah toh u kylli ko ya idæ yow pait iyi wa leh ki wei iyi wa da leh ki.”

Related posts

Ki paidbah pynbor ki ya kiwa mihkhmat wow wan cha ki yalang tangwa chah khñium won lada pynemkaam Siren: Paul

November 18, 2024

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Hawa kdaw yei rai hajrong i pynbait pood wa ka Assam wa ym man ko kawa suk, u Conrad da ong u, “Da toh sakhiat ka rai kawa eh wow chim tangwa lyngba i ya phyllu yumut, ya syllok lang wa ki paralok wa ya krehlang, i da chim i ya kani ka rai kawa khia wei wow lai chakhmat wow pynkut noh ya ka phang kajia pood.”

U Conrad da ong u, “Ki paaid chong chnong ka jylla da e ki ha i ka bor tæ kamtæ i hap i wow jied kammon u wanrah yei kylla hei im yong ki bar yow sihlet hadien.”

Chooh chooh da ong u wa awjan waroh ki paidbah katni ki yaklam bait ki hajrong i kaam ya pynbait pood hapyrdi ka Meghalaya wa Assam, “Hao man sakhiat ko ka kaam wa eh tangwa kam ka sorkar ka hap ko wow lai chakhmat. Kiwa chong chnong yong ka jylla da hap ki wow yang hadooh 50 tylli ki snem, ym man ko ka rai kawa suk tangwa i chim i na ka bynta ka bha i biang yong kiwa chong chnong ka jylla.”

Puræ leh: Cha ka yung bichaar u lai ka KHADC yow pynsangeh yaka soskular pynbait pood