Hadien wa dong biang u Zenith Sangma cha ka Congress, neiliang u Mukul Sangma uwa man leh kam u payu u, da ong wa ini wa leh u toh deiwa em kyrmen tangwa iwa bakla.
Da ong u wa ki kam ka yung ka sem dang neh ko kamjooh hanla psiah ki cha kawon kawon ka Party tangwa iwa hakhmat dooh toh i chakri paidbah.
U Mukul da ong u wa manda em u wa ki paidbah, oo em u ki hajar ngut ki payu para wa ki pyrsa wei hawa kylli lada oo leh daw uiñ biang u cha ka Congress, da ong u wa i rukom synchaar ya ka Congress da ki heh ko toh iwa leh embor.
Neibhah i pyrchang ki National Party toh wow pyntlot yei bor kiwa synchaar hapoh ka jylla heiwa ki wa jied kiyi wow man Minister kiyi wow man Chief Minister deiwa pynkynmoo u heipor wa chah pynbor u wow pynhiar chuki Montri sorkar ya u Prestone wa u Sniawbhalang hadooh wa kylliang ki ya u heh ka Party, u D.D. Lapang deiwa thung da u Celestine Lyngdoh du kattu katni bnai chwa ka Election 2018.
Kamtæ da ong u wa kammon u pynlai ya ka sorkar hawa em bait kiwa tuklar wa e hukum iyi wa toh u leh.
Heiyatoh won wa ka Election GHADC ha u snem wow wan, da ong u wa ka TMC daw pynyieñ kyrtong ko wei heiyatoh won wa ka Election MLA ha u 2028, da ong u wa daw man u snem wow krehlang kiwa boon ki Party ha Meghalaya.
Discussion about this post