U President ka Meghalaya Pradesh Congress Committee (MPCC) uwa man leh u MP na Shillong, u Vincent H. Pala ynne ka sngi da pynbaad u wa ka National People’s Party (NPP) wa ka United Democratic Party (UDP) kiwa kreh ha ka synrop sorkar Meghalaya Democratic Alliance (MDA) da booh ki ya ki Check Gate wow khrong poisa.
Da ong u wa waroh ki COVID Camp wow sylli ya i chait i khiah ki bru da man ki kam ki ATM ka UDP wa NPP heiwa da ong u wa hawa lai na Shillong cha Jowai, daw sakhi ya ki Chek Gate wa khian, ki Police Check Gate, Forest Check Gates wei kini waroh man ki kam ki ATM yow yoh pynlut neibynta ka Election.
Chooh chooh da ong u wa ki paidbah da bichaar bniah ki ya ka Congress heipor wa em ko hei bor wa heipor wa em ko ha ka liang pyrchah deiwa pynrap wa heipor wa em ka Congress hei bor waroh man ki kiwa hapoh i pynlai (Under Control) tangwa katni da em ki kaam tyngkheiñ aiñ ha kylleiñ wei heipor ka Congress ym jooh em mih ki kaam chah pynbaad tang kawi leh.
Hajrong i ku dor i phñiang, da ong u wa ini man i ka sien wa nyngkong wa i dor i Petrol da tam i ya ka T. 100 deiwa beiñ ya ka sorkar wa wot ki kor thaw ya i phñiang da kylliang neibhah wa ki paidbah ka ri wa wot ki Engineer wa chna ya ki ympoi pyrkhat ki wow tam i dor palat T. 100 chi litre.
Da kam u leh wa da yaklam u wa ki sahep kiwa da khana wa da hap kylliang ya kiwa boon ki kor neibhah wa ki kor toh kiwa ye u e yukheiñ du da ki phaw ym da ki spah (Two digit ymtoh ki Three Digit) kamtæ da hap kylliang noh ya ki.
Da ong u leh wa i ku dor i phñiang daw ktah bha i ya ki paidbah kiwa im cha palatsor neibhah wa pynemkaam ki ya ki sarok hawa lai wa wan.
