U President ka Meghalaya Pradesh Congress Committee (MPCC), u Vincent H Pala da ong u wa ka Party da dep ko wow yooluti wa kiwi ki kynhun na ka seiñ daw mih ki hadien wa mih noh ki 12 ngut ki MLA wa lai psiah cha ka All India Trinamool Congress (AITC), lada ki National Student’s Union of India (NSUI), ki Mahila Congress næ ki Youth Congress.
Kam wow kdaw wa ha kani ka tayaw ka Congress da nang stang ko neidaw wa mih noh kiwa yahkhmat, wa kynthup ya u James Lyngdoh uwa man u Working President wa u Manas Das Gupta uwa man u General Secretary warim ka Congress, wa sa i ieh kaam kamwa 600 ngut ki dkhot ka NSUI hapoh i yahkhmat u President, u Bansharailang Pyngrope wei hadien chi sngi kamwa 400 ngut ki dkhot ka Meghalaya Pradesh Youth Congress (MPYC) da phah ki ya ka chithi iehnoh kaam. Katkam i pynbaad da kiwa yahkhmat khynroo, ka NSUI wa ka MPYC da ong ki wa ka Congress katni toh ka Party du neibynta kiwa em poisa.
Hawa kylli ynne ka sngi, u Vincent Pala da ong u wa hadooh katni ym jooh em paan poisa u na uwon uwon leh, deiwa ong wa ye u man wa ki toh ki bru kiwa lai cha oo yow yoh yakhun Election, heiwa da pyntip u leh wa em uwi u khynroo wa kwah wow yaleh Election wei wow lai pait ha kylleiñ ka Constituency, wei neiliang yong oo kam u President ka Party da ong u wa toh wow sñiawthooh ya jar jiar i bor, neibhah ka Party daw yarap wei da kylli leh yei em wa i ye yong ki kamjooh i yatoh yong ki wa ka Constituency wa kwah ki u yakhun. U President ka MPCC da pynrap chooh chooh u wow ong wym jooh em paan poisa na uwon uwon heiwa nadooh wa man President da hap u wow pynlut hi na kata.
Hawa yatoh wa i mih ki khynroo na ka NSUI wa MPYC, u Vincent da ong u wa ki dkhot ka NSUI ki da em kiwa da mih wei em kiwa neh leh. Da ong wa mar ya wan chimkti kam u President ka MPCC da hap u wow pynkut ya ka NSUI neibhah ha ki Block da pynkut lut wei da thung da ki President wa ki Secretary wa thymme, wei ya ka NSUI da toh wow pynkut lang tangwa neiliang u President ka NSUI da ong u wa u neh bait u kamtæ ym em da pynkut de, neibhah wa ka NSUI wa ka Youth Congress ki hap ki hei pait na Delhi katwa ka MPCC yarap donhi ko ya ki.
Da ong u leh wa ki Youth Congress ha i por wa chimkti ya i kaam, ki khynroo da em ki du soo san ngut ngut, tangwa man iwa lyngngoh wa ha i por wa ieh kaam ki, da mih da ki spah ngut. Da ong u wa hei yong sakhiat ki Youth Congress ym em de ki katni neibhah hadien wa da chimkti da oo, da yoo wa ki khynroo wa tlot ware ki, heiwa da phah wow pynpsiah pyrtuid thymme wei hadooh ynnin ka 3 tarik da em palat 5000 ngut kiwa da pynpsiah pyrtuid yeiwa daw pynman da ka Election wow jied ya kiwa yahkhmat. Da ong wa i yut yong ki khynroo toh du i pynbiej yong ki kattu katni.
U Pala da ong wa kini ki khynroo wa da mih katni toh du ha ki pytruid, tangwa kiwa dang sah toh kiwa kreh yei kaam, kamwa man katni ym ktah ya ka Party nei mih ki kattu katni.
Hajrong i mih noh u James Lyngdoh, da ong wa ye u man wa em i sñiawthooh bakla wa em i wym kheiñkor næ leh mylliñ ya oo, deiwa pynrap wa ym em kam itæ neibhah tang wow kreh bha kam u President ka MPCC leh ym pu yohlaad.
