U Montri Rangbah ka jylla, u Conrad K Sangma da ong u i chngaaiñ wa i yada man ko iwa hakhmat ya kiwa chong chnong ha Lapangap, hanla emkaam ki wow lai ah ya u kba wa da thung ki.
Ki liang wa boon na ka chnong ka Lapangap hapoh i yahkhmat u waheh chnong, ynnin ka sngi da kyrpaad ki ya ka sorkar wow pynboon chooh chooh ya ki pulit ha katai ka chnong wa em ha khappood wa ka West Karbi Anglong khnang yow ye ki u ah ya u kba na ki hali.
Hawa klam ynne ka sngi, u Conrad da ong u wa kiwa yahkhmat chnong ka Lapangap da kyrpaad ki wow e laad u ah kba, tangwa neidaw wa em i kynaad, kamtæ i chngaaiñ wei yada man ko kawa emkaam ware.
Da ong u wa wot hawa ka sorkar da pynbiang ki bor pulit wow e yada tangwa i kynaad ha khappood em i wei ini ymtoh wa ka sorkar Meghalaya ym em tuklar ko, tangwa ka sorkar ym kwah ko wow mih iwon iwon i jia wa rap heh chooh chooh ha katai ka thaaiñ, wei da pyntip u wa ynnin ka sngi da kyntu ya kiwa chong chnong wow kiar wei yaichah ki ha kam ini i por.
Heijooh i por da ong u wym poi pyrkhat wa kam ini u jia i ha khappood hapyrdi wa i yaklam yong waroh arliang dang mihsoh i tangwa syndet syndet da mih i ya kajia wym poi pyrkhat.
Da ong uwa neiliang ki pulit ka Meghalaya wa ki pulit Assam da phylla ki wa hawa dang em i yaklam hapyrdi yong ki da jia i kynaad wa rap cha jngai na i thaw wa em ki paidbah.
U Montri Rangbah da ong u wa ha kam kini ki por ym man wow pynheh chooh chooh yeiwa jia, wei da kyntu u wow kiar chwa kattæ na kiwon kiwon ki kaam ha katai ka thaaiñ wei wow e laad chwa wa i chongsuk chongsaaiñ u wan biang i wei wow thooh laad yow pynbait yei eh.
U Conrad da pyntip u leh wa neiliang kiwa chong chnong ka Lapangap da kyntu ki ya ka sorkar wow yaklam wa ki bor synchaar ka Assam, ya iwa ka sorkar dang leh ko kattæ wow thooh laad.
Discussion about this post