U Montri ka chnat puræ puthi ka jylla, u Lahkmen Rymbui da pynsñiaw u wa man iwa bha wa ki khynnah wa puræ ha ki skur samen (Private) da leh bha ki ha ka Exam SSLC wa dang dep pynbna da ka MBOSE.
Da ong u wa ki skur sorkar i Pass ki khynnah man iwa biang, tangwa da pynsñiaw u yei sñiawkhia, neibhah kiwa sikai ha ki skur sorkar toh kiwa da rap pliah wei kiwa da chah hikai kamjooh kiwa yoh ya ka tulop wa heh.
Chooh chooh da ong u wa i daw wa ki skur sorkar sah ki chadien toh neidaw wa mar Pass da yabeh ki khynnah cha ki skur wa heh, wei da jied ya ki skur sorkar du hawa kutlaad wei ini ymtoh iwa bha. Da ong u wow pynkylla yeini ymtoh du i kaamram ka sorkar, tangwa yong waroh kiwa embynta toh u man kiwa chimkhia.
Heiyatoh wa i Pass wa du kamwa mar chiteiñ wei kiwa duna dooh toh ha thaaiñ Garo Hills, u Rymbui da ong u wa uni u snem ki khynnah da pyrchang ki wow leh bha, tangwa ha ki bynta ka Garo Hills dang hiar ware i, wei kopsar hap leh iwon iwon wow kynrong ya ka thaaiñ, wei daw chong ha ki bor pynlai skur, kiwa sikai wa ki khynnah.
