U President ka Meghalaya Pradesh Congress Committee (MPCC), u Vincent H Pala da ong u wym em i sñiawsuk kajiak leh yei synchaar yong ka sorkar MDA ha ki 5 snem wa 10 bnai wa da dep, tangwa neidaw wa em i sñiaw leh heh yong kiwa yahkhmat ka Congress, ka sorkar MDA da yoh laad biang ko wow synchaar sa chisien.
Da ong u wa ki paidbah katni da sñiawthooh ki ya ini wei daw pyrkhat bha ki nadooh manda jied ha ka Election Lok Sabha kawa daw man ha uni u snem.
Hawa kynthah yei krehkaam ka sorkar MDA, u Vincet Pala uwa man leh u MP ka Lok Sabha da ong u wa ka sorkar MDA kawa da lai wa kawa katni ym ye ko wow ksoh yeiwa da kular kamwa da khlai wow pynbiang kreh ya kamwa 5 lak ngut ki khynroo khyllood, neibhah hadooh katni tang 1 lak ngut leh ym yoh yei kaam wa biang, wei lada kheiñ ya ini i kular da kylla nod i.
Da ong chooh chooh wa hawa yatoh wa i kular wow pynlait tih ya u mooyong leh nod, tangwa da pynmih pathan boon tylli da ki karkhana ‘Coke Plant’ kiwa da pynkylla bih yaka la-ær wa ki paidbah pynemkaam ki.
Da kdaw u leh wa neidaw wa em ki karkhana Coke, ki paidbah da pynman ‘Orange Festival’ ki khlem u soh khontara.
Da pynbaad u leh wa ki rai wa da chim da ka sorkar MDA man bait ki du neibynta wow yoh lum poisa, wei kani ka sorkar da pynjæd ko ya waroh kawi ka Jaiñtia Hills, ka West Khasi Hills wei kamjooh leh ya waroh ki thaw khappood.
Discussion about this post