I lai pait u Montri sorkar wa ksoh ya ka chnat i chait i khiah ka sorkar jylla, u James K Sangma deiwa khut u MDC ka Sohryngkham, u Pynïaid Sing Syiem uwa man u Chairman ka KHADC ha ka 24 tarik uni u bnai ya ka Sohryngkham Health Sub-Centre da wanrah ya ka khubor wa sñiawkmen ya ki paidbah wa chong chnong ka Sohryngkham.
Ini i sñiawkmen toh hadien wa kular u Montri wa hapoh yong kani ka samoi krehkaam daw pynku kyrdan noh ya ka Health Sub-Centre cha ka kyrdan Public Health Centre neibhah wa ini toh i angnood wa da slem bha yong ki paidbah ka thaaiñ neibhah ka chnong Sohryngkham hi toh ka chnong kawa da boon bha kiwa chong chnong wei du da ka Health Sub-Centre ym ye de wow pynbiang yeiwa emkaam.
Deiwa kdaw hawa klam ha ka yalang wa ka Dorbar Chnong Sohryngkham da dep ekti ko ya i thaw cha ka chnat i chait i khiah wow chna ya ka PHC, u James K Sangma da ong u, “Ka chnong Sohryngkham toh ka chnong kawa da bna neibhah toh ka chnong nongkyndong kawa heh dooh hapoh ka dewbah Asia wei kamtæ em ko i hok wow pynku kyrdan noh ya ka Health Sub-Centre cha ka kyrdan PHC.”
U Montri da ong u wa da man iwa eh ya oo wow tip yei eh yong ki paidbah lada kiwa yahkhmat ym wan yachem ki wow pyntip hawa yatoh wa i eh wa da maad ki wa iwa emkaam ki paidbah ha i liang yong i chait i khiah. “U MDC yong phi da wan u wow pynsñiaw ha nga yei angnood wow pynku kyrdan noh ya ka Sub-Centre cha ka PHC napyrdi kiwa boon bha kiwa da wan wow dawa pynku kyrdan ya ki PHC ha ki thaw waphær waphær”, ong u James.
“Nga daw chim O ya kani kam ka phang wa hakhmat dooh wei hapoh kani ka samoi krehkaam daw pynmankaam neibynta u pynku kyrdan noh ya ka Health Sub-Centre cha ka kyrdan PHC”, ong u James K Sangma deiwa kdaw wa i biang ki thaw e sumaar hi man ko kawa kongsan dooh neibynta ki paidbah wei emkaam wow poi lut cha ki kdong ki chmiang ka jylla.
Neiliang yong u Pyniaid Sing Syiem hawa klam ha ka yalang, da ong u, “Nadooh u snem 2008 ki paidbah wa kiwa yahkhmat chnong da angnood ki, wei neiliang u Montri ka chnat i chait i khiah (James K Sangma) uwa dang yoh wow ksoh ya chnat i chait i khiah da kwah u wow wan cha Sohryngkham wow pait hawa yatoh wa i angnood ki paidbah”.
U Pyniaid da pyntip u wa kiwa yahkhmat chnong da dep ki wow e ya ka kot i thaw neibynta wow chna ya ka PHC wei ya kani ka kot da em hapoh ka yung krehkaam u DHS. “Nga leh kam uwa mihkhmat daw booddien O ya ini i angnood kiwa ki paidbah da pynsñiaw ki khnang wa daw man i myntoi ya uwa boon walang hawa yatoh wa i chakri na ka chnat i chait i khiah ka sorkar jylla”, da ong u.
