U Symbood Montri Rangbah ka jylla Meghalaya, u Sniawbhalang Dhar, ha ka 3 tarik da lai hiar u cha ka chnong Khanduli kawa man ka chnong wa em khappood waka jylla Assam yow yachem wa kiwa yahkhmat kani ka chnong hajrong kiwa boon ki mat wa ka chnong da maad ko nadooh i chongsuk wa i chong chngaaiñ, i roi i paar wa kiwi de.
U Sniawbhalang da lai pait u leh ya ka Khanduli Secondary School kawa da seiñ wei pynlai da ka Dorbar Chnong Khanduli wei da emlang ha kani ka sngi wa kiwa sikai yong kani ka skru, ki dkhot ka SMC wa kiwa yahkhmat chnong.
Da yoh u leh wow wai ya ka Fete yong ka Dorbar Chnong Khanduli, kawa da pynman yow pynmih poisa kyrpang neibynta ka Khanduli Secondary School kawa da pynku krdan nadooh u snem 2015 cha ka Secondary School.
Neiliang u Yoshida Nongspung, Waheh Chnong Khanduli da pynsñiaw u yei sñiawngooh ya u MLA u wym jooh ieh ya ka chnong hawa jia iwon iwon i eh wa maad ki.
Kiwa pynlai ya ka skur da pynsñiaw ki yei eh wa da maad kani ka skru nadooh i wym biang ka yung pynman skur, ki luit lai kjat wei khamtam ka tulop kiwa sikai wei da e ki leh da ka dorkhat kawa da ong wa du ka bai tulop ya kiwa sikai dapoi ko hadooh Rs. 4,44,000 chi snem.
U Sniawbhalang hawa e yei klam da e khublei kyrpang u ya ki bru waheh ka chnong Khanduli yei chynna jngai yong ki wow seiñ ya kani ka skur kawa daw man i myntoi ya ki pateiñ wa daw wan ha ka chnong ka thaw.
Da ong u leh wym jooh em mylliñ u ya kani ka skur wei dadep yarap u ka da boonsien nadooh wow chna ya ka yung skur wa kiwi de kiwa emkaam heiwa da kyntu u ya kiwa chong chnong wa toh u kamtre ki ya kani ka skur wei toh u kyrchaan lang ya kiwa pynlai ya ka skur.
Da sneiñ u ya ki kynnah skur wa toh u kreh chitom wei ymtoh wow thmu u lai skur du wow yoh kreh sorkar, tangwa toh u pynpliah ya idæ neibhah wa em boon ki laad ki luti wow kreh manda biang i stat i tip.
Kamtæ da kular u wow kyrchaan ya ka skur kamwa Rs. 5 lak yow yarap yeiwa emkaam kani ka skur ha kiwa boon ki bynta.
Discussion about this post