Kwah ka HNLC wow pyndam ya waroh ki kyndon aiñ wa da chah pynngat yow ye u yaklam yasuk

Ka Hynniewtrep National Liberation Council (HNLC) da dawa ko naka sorkar wow pyndam noh ya waroh ki kyndon aiñ wa da pynngat kamjooh ki mukotduma wa da em pyrchah ya ka seiñ kamjooh ki dkhot ka seiñ chwa wow lai chakhmat i yaklam yasuk.

I yaklam yasuk hapyrdi ka HNLC, ka sorkar pyrdi waka sorkar jylla da pynman biang ynne ka sngi ha ka Guest House ka Meghalaya Energy Corporation Limited (MeECL) wa em ha Umiam.

Hawa yaklam wa kiwa thoh khubor hadien wa kut ka yalang, neiliang u ksiang ka HNLC, u Sadon Blah da khana u wa iwa yaklam ynne da man bait ko yow pyrkhat ka sorkar yow pyndam noh ya waroh iwa da chah pynngat ka HNLC ha ki kyndon aiñ kamjooh ki mukotduma wa ki Charge Sheet kiwa dang em katni.

Da ong u leh wa i yaklam ynne toh yow wai ka luti yow pynlait noh ya ka HNLC na waroh ki kaam wa pyrchah aiñ.

Related posts

Da pynkhreh ki thaw sumaar ha West wa South Garo Hills wow yarap ya ki bru wa chah ktah: Ampareen

October 9, 2024

Khut ka NPP ya kiwa kwah u yaleh Election MDC cha ka JHADC

October 8, 2024

Ya ka HNLC ynne da mihkhmat da 7 ngut ki dkhot wa u Sadon Blah, ya ka sorkar jylla da mihkhmat da u ksiang ka sorkar u PS Dkhar, u Magistrate R. Wahlang katwa na ka sorkar pyrdi lyngba ka Home Ministry da mihkhmat da u AK Mishra, Rtd. IPS Officer.

U Vice Chairman ka HNLC, u Manbhalang Jyrwa da ong u wa ka sorkar da e ko yei jubab wa miat wei iwa pynchlur ya ki neibhah kani toh ka sien wa le wa da chong yaklam wei da pynsñiaw u yei sñiawngooh ya ki ksiang ka sorkar jylla kamjooh u yong ka sorkar pyrdi.

Da pyntip leh wa ka Home Ministry daw pait ko ya ini i dawa yow ye u pynmankaam ki smat.

U ksiang ka HNLC da pyntip u leh wa ha i yaklam ynne ym em wanrah kiwi de ki phang yaklam wei emkaam wow wai chwa ka laad yaklam wow maap ya waroh ki kaam wa da pynngat pyrchah ya ka HNLC.

Kani ka yalang da man ko leh kam chibynta wow pteiñ yeiwa da dep pynman ha u bnai wa dep kawa da booh tarik wow pynman ha ka 6 tarik tangwa nei daw wym ye u kiar da hap rah cha ynne ka sngi.

Kam wow pynkynmoo wa ynnin u snem, ka National Investigation Agency (NIA) da Charge Sheet ko ya soo ngut ki dkhot ka HNLC heiyatoh heiyatoh wa i tympdung Bomb ha i thaw sah ki wakreh ka Star Cement Factory Colony Lane, East Jaiñtia Hills iwa da jia ha ka 12-12-20.

Puræ leh: Charge Sheet ka NIA ya soo ngut ki dkhot ka HNLC