Shillong: Uwa yahkhmat ka NPP, u Prestone Tynsong uwa man leh u symbood montri rangbah ka jylla, da pynsñiaw u yei kwah u wow lai kam u MP cha Rajya Sabha lada ka Party yoobiang ko ya oo.
Ya ini da ong u Prestone hawa yaklam wa kiwa pathai khubor hawa kylli yeiyi yoobiang ka Party wow phah kam u MP. Da long u wa lada ka Party yoobiang ko ya oo, kwah u wow yakhun ya kani ka kaam MP.
Ha kani ka jylla, u Prestone toh uwi na kiwa yahkhmat ka NPP uwa da rap heh dooh napyrdi ki MLA, uwa ka Party ye sakhiat ko wow tyrwa lada bien u.
Heijooh i por da ong u wa ya u kyrtong wow yakhun MP Rajya Sabha, daw pyntikna chwa wow thap pyrtuid neibhah katkam wa man katni em boon kiwa biang wow yakhun ya kani ka kaam.
Ka Election jied ya u MP cha ka Rajya Sabha daw man ko ha u Naitung (Apr) uni u snem hadien wa kut ka samoi ka Wansuk Syiem na ka Congress kawa da man MP la 6 snem kattu.
Kamwa man katni ka NPP thmu ko wow pynyakhun da u President yongka, u Dr. WR Kharlukhi tangwa neiliang u Dr. Kharlukhi ym kwah u ya kani ka kaam wa da tyrwa ya oo da ka Party wei katkam wa man katni ka NPP dang thooh bru ko da kiwi.
Discussion about this post