Shillong: U MLA ka Congress na Mawlai u Process T Sawkmie da dawa u hapoh ka yung dorbar ka sorkar jylla wa toh u tuklar ko wow pynlait toh dan ki bru ri-loom kiwa kreh cha baar jylla neibhah wa katkam wa man kattæ ki bru ri-loom hap su ki yaka dan kawa tip kam ka Income Tax khamtam manda seiñ khih ki da i yong ki hi.
Hawa wanrah ya kani ka phang ynne ka sngi, u Process da ong u wa kani man ko kawa ktah bha ya ki paidbah na ri-loom tangwa da sahkut ko kamtæ donhi.
“U kurim wa kreh cha baar jylla oo toh dan u, katwa ka kurim kawa em haka jylla yong ka hi ka lait ko naka dan. Kani da wanrah ko yei yaphær”, da ong u Process.
Da ong u waka sorkar ka toh ko wow pynlait na i toh dan ya ki bru ri-loom hawa em ki cha iwon iwon thaw ka ri wa kreh ki khnang yow lait i yaphær.
Da dawa u wa ka sorkar ka toh u chimkhia ko wow yaklam waka sorkar pyrdi yow pynlait na i toh dan ki bru ri-loom kiwa em cha baar ka jylla yong ki.
Hawa jubab ya ini u Montri Rangbah ka jylla u Conrad K Sangma da ong u wa ka chnat Income Tax ym em haap ko haka sorkar jylla tangwa ka sorkar jylla u pyrchang ko wow yaklam hajrong ini waka sorkar pyrdi.
U Conrad da ong wa hei yong sakhiat wa ya kani ka kaam, em ko ha ka kti ka sorkar pyrdi neibhah ka Income Tax toh ka chnat ka sorkar India wei chong haka wow pdiang namo ym pdiang ya ka ini i dawa.
U Conrad da ong u leh wa ini i khrong dan ya ki bru ri-loom kiwa kreh cha baar ka jylla yong ki da sdang ko nadooh i por wa nachwa wei ym toh iwa thymme.
Discussion about this post