Ka Meghalaya High Court ynne ka sngi da pynksan ko ya ka hukum wa da pynmih da ka District and Sessions Court, Shillong wow e jamin ya ka Sonam Raghuvanshi kawa man kawi na kiwa suba wow pynyap ya u kurim ko, u Raja Raghuvanshi heipor wa wan ki cha thaaiñ Sohra, iwa mut da rem i yaleh ka sorkar pyrchah yeini wa e jamin.
Ka miej bichaar u Justice W Diengdoh, Judge da kyntait u yei kyrpaad ka sorkar jylla yow yaleh pyrchah ya ka hukum wa da pynmih ka Additional Deputy Commissioner (Judicial), Shillong ha u bnai April uni u snem wow e jamin ya ka Sonam kawa da kdaw wym em biang i rukom pyndap ya ki kot ki sla.
Ka High Court ynne da pynmih ko ya ka hukum hadien wa chimpor 10 sngi hadien wa ap yeiwa da yasaaid waroh arliang.
Kam wow kdaw heini wa ka Additional DC da e jamin ko deiwa ong wym em pyntip cha ka Sonam yei daw wa chah kem ko heiwa ha ki kot ki sla da kdaw boonsien ya ka Section 403(1) ka Bharatiya Nyaya Sanhita (BNS), kawa man ka kyndon wa emkti heithaw wow pynemkaam ya ka Section 103(1), kawa man neibynta ki kaam pynyap bru.
Ha itai i por da kyntait yeiwa yasaaid wa ini toh iwa bakla donhi wow pyndap ya ki kot ki sla.
Hapoh ka High Court won neiliang u Advocate General, u Amit Kumar, da yasaaid u wa du neidaw wa bakla u pyndap ya ka kot ka sla ym ye u man wow e jamin neibhah ka Sonam da tip che ko iyi wa chah pynbaad ko.
Neiliang won u Justice W Diengdoh won da kylli u wa kammon sang i jooh i bakla u mih i ha kiwa boon ki kot ki sla.
Discussion about this post