Ka East Jaintia District Cricket Association (EJDCA) da pynche ko heiyatoh wa ka ujor wa da booh da ka Ladrymbai “B” Sports Club kawa da pynbaad wym em bood ya ki kyndon wa pynlai ya ka Tournament.
Ka EJDCA da ong ko wa ya kani ka ujor da pdiang ka wei ym em kyntait ka heiwa da pynman leh yei takit wa biang da ka Association deilang ka Tournament Committee.
Da pynman leh ya ka Meeting ha ka 8 tarik uni u bnai deiwa emlang kiwa mihkhmat na waroh ar tylli ki Team, kitæ ka Dienchynrum Sport Club wa ka Ladrymbai “B” Sports Club, heiwa waroh arliang da e laad wow pynsñiaw ki kamjooh yow pynche.
Hadien wa da pait bniah ya ka ujor ka Ladrymbai “B” Sports Club, neitæ i pynche ka Dienchynrum Sport Club kamjooh ki Rules & Regulations wa pynlai ya ka Tournament, da chim rai ka EJDCA deilang ka Tournament Committee wym em tyngkheiñ ka Dienchynrum Sport Club ya ki kyndon ka Tournament.
Ini i rai toh iwa da chim katkam ki kyndon khamtam deiwa pait ya ka Rule No. 16 wa Rule No. 17, kiwa man ki kyndon wa klam ya ki Player wa ye u yalehke.
Ka EJDCA da ong ko wa ka Dienchynrum Sport Club ym em leh chynnam ko wow tyngkheiñ kyndon wei iwa khut ya kiwa yalehke toh deiwa sñiawthooh ki ya ki Rules & Regulations.
Kamtæ da chem wa ka ujor ka Ladrymbai “B” Sports Club toh kawa ym ye u yieñ kamtæ da pynkut noh ka ha katai hi ka sngi.
Ka EJDCA da ong ko leh wa burom ko yei sñiawkhia ki Club tangwa chisien wa da chim rai da ki bor wa toh u pait da man ko kawa da skem lait noh wa em wa pait ka deiwi katkam ki kyndon.
Kamtæ da ong wa ka Association toh kawa kreh khlem leh chiliang, deiwa khooid, deiwa ryntih wei dei mynsien yaleh Cricket ha waroh ki Tournament wa pynman.
Ha iwi won i liang, ka EJDCA da pyntip ko wa da pyndep leh ya ka yalehke Final ka District League 2026 ha ka 26 tarik uni u bnai hapyrdi ka Dienchynrum Sports Club wa ka Lumshnong Block Cricket association.
Ya ka kylla-khlem da jop da ka Dienchynrum kawa da jied wow kawang bol chwa. Kamtæ ka Lumshnong hawa kamai nyngkong da yoh ko 223 Run na ki 28 Over deiwa haap lut ki Wicket. Ka Dienchynrum hawa beh ya ka thong da ye ko wow yoh du 97 Run deiwa dooh lut ki Wicket na ki 15 Over.
Kamtæ ka Lumshnong Block Cricket Association da jop ko da 126 Run yow man kam ka Champion ka District League 2026.
Yei naam Man of the Match wa Man of the Series da yoh u Rajen Dkhar na ka Lumshnong Block Cricket Association uwa yoh u pynhaap 12 Wicket wei da kamai u 97 Run.
Puræ leh: Ujor ka Ladrymbai-B SC cha ka MCA yow pynsangeh ya ka yalehke Final wa daw pynman ka EJDCA
Discussion about this post