U Montri Rangbah ka jylla, u Conrad K Sangma da kyntait u wa em i baamsap hawa yatoh wa i thied kari ha ka chnat pulit yong ka jylla, heiwa da ong wa ya ka bui (Report) yong ka takit hajrong i thied ya ki kari dang dep wot kawa da e kti ynne i step ka 25 tarik.
Da ong u wa i thied ya ki kari toh katkam ki kyndon wei ym em iwon iwon wow ong wa leh dei wym toh, tangwa da ong u wa ye u em i duna heini heitai tangwa ym ye wow ong wa em i baamsap.
Hawa kylli lada ka sorkar daw beh kreh ko chipor namo wow Suspend ya u pulit wa pynemkaam bakla yei bor, u Conrad da ong u wa ka sorkar daw puræ bniah chwa ya ka Report wei daw bichaar yow leh yeiwa toh u leh.
Kam wow pynkynmoo wa da em i pynemkaam bakla hawa yatoh wa i thied ya ki kari ha ka chnat pulit, heiwa ka chnat da thung ko leh ya ki bru wow takit wei katkam ka Report wa da lait paidbah ha ki kattu katni ki laad pathai khubor, da pynbaad wa u Assistant Inspector-General of Police (Administration), u Gabriel K Ïangrai da pynemkaam bakla u yei bor.
Hawa yaklam wa u Montri kaam Pohyung ka jylla, u Lahkmen Rymbui da pynsñiaw u yei lyngngoh wa ka Report da lait paidbha ko chwa cha ki laad pathai khubor hachwa u yoh pdiang u DGP wa ka sorkar.
Da ong u wa lada em iwon iwon i leh tam da uwon uwon, ka aiñ daw bood ko ya ki kyndon wa toh u leh. Da ong u wa ya katni ym pu kwah wow ong iyi iyi hadooh wa da yoh ya ka Report.
Da ong chooh chooh wa lada em kiwa pynemkaam bakla, ka aiñ daw leh ko ya iwa emkaam.
