Shillong: U Montri Rangbah ka jylla, u Conrad K Sangma da kyntait u ya i mih khubor wa em i chalan wei tih tooh ya u mooyong na ka thaiñ South West Khasi Hills.
U Conrad da ong u wa ka sorkar hadien wa mih khubor ha ka 16 tarik uni u bnai da phah takit u ha u Deputy Commissioner ka SWK, wei katkam ka bui wa da phah da u DC, ym em itæ i chalan namo i tih mooyong tooh. Da ong u wa katkam ka bui na u DC, u mooyong wa da chondur ha ka kot khubor toh iwa na Bangladesh.
U Montri Rangbah uwa pait ya ka tnat Mining & Geology, da kyntait u leh wa i lai Delhi ki montri wow yaklam wa ka sorkar India wow pyllait noh ya u mooyong ha ka jylla toh i wow pynsepai hi-eh ya ka poisa paidbah.
Da ong u wa i lai ka sorkar cha Delhi wow yaklam wa ka sorkar India toh wow yoh biang u tih mooyong ha ka rukom kawa biang, khlem pynjæd ya ka rymaw wei wow pyntikna wa ki khynnah kiwa hapoh 14 snem i rta ym kreh ki wa u mooyong.
U Conrad da ong u yeini hawa pynche yei mih khubor wa da wanrah da u MLA ka Umroi, u George B Lyngdoh, chwa ini u George da ong u wa katkam kani ka khubor, em i tih mooyong tooh da ki kattu katni ha ka thaiñ West Khasi Hills, wei kani man ko kawa pyrchah ya ka aiñ neibhah wa da tyngkheiñ ya ka hukum ka National Green Tribunal (NGT).
U George da pynsñiaw u leh yei sñiaw phylla wa u mooyong wa da dep tih da thaw da u phut (measuring tape), iwa mih che wa em i tih moo tooh ha ka thaiñ.
Chooh chooh da ong u wa ym du itæ wa da tyngkheiñ ya ka hukum ka NGT deiwa tih khiar ya oo tangwa i leh kamni da wanrah ko ya i pynkreh yabor ya ki khynnah kiwa dang hapoh 14 snem heithaw wa toh u em ki ha skur, daw ktah i leh ya ka rymaw, pynjæd ya ki sarok neidaw wa kit palat pood wa kiwi kiwi.
Heijooh i por u MLA ka Umroi da ong wa ym mut wa i lai ki montri sorkar næ ki sahep cha Delhi wow pyllait tih mooyong, tangwa da man i iwa pynlut sepai hi-eh ya ka poisa ka jylla.
Discussion about this post