15 49.0138 8.38624 1 0 4000 1 https://wyrta.com 300 0
Advertisement ad1

Kyntait u DC yei dawa beh kreh ka EJNC
Chah pynkhor ka seiñ heipor wa yachem wow DC

1 Comment
Advertisement ad1
Advertisement ad1
Advertisement ad1

Jowai: Ynne ka sngi ka East Jaintia National Council wa ka West Jaintia National Council da yachem ki wa ki bor ka district hapoh ka conference hall ka ophis DC ha Jowai.Kani ka yachem toh da pynman hadien wa u DC ka West Jaintia Hills da khut u ya ki dkhot kani ka seiñ hadien wa pyrchang ki pynman da chong kyllaiñ myngor ha pchem ka Civil Hospital Jowai, kawa em ha Ialong kam i dak pyrchah ïa i chah tba kti u Graham Lyngdoh ha u chowkidar wa u dribar ka hospital ha ka miet yong ka ha ka 19 Ñaisaphra uni u snem.

Katkam i khana u DC da kynnoh u ma Graham Lyngdoh wa ha ka tai ka miet u dribar wa u chowkidar kani ka hospital da thaw Blood Pressure ki ia kawi ka bru wa wan libooh u cha kani ka thaw sumar. U ma Graham ha ini i por da pyrchah ïa ini deiwa ong u wa emkaam u leh kam ïa ini i kaam da ki nurse. Da kynnoh u leh wa kini ki bru ka hospital man ki kiwa da sma kiad wei da dat ki oo hadien wa pyrchah u yeini i leh ki.

Ha ka yachem na ka liang yong ka Civil Hospital da wan mihkhmat da ka Dr. A.E. Paswet Medical Superintendent ka hospital kamjooh leh da emlang wa ki arnut ki wa chah kynnoh tba kti ia u ma Graham. Katwa u ma Graham ym em wan u ynne ka sngi.

Ïa ki dawa ka seiñ kiwa wow beh kreh chipoor (suspend) ïa kini ki arngut ki nongkreh ka hospital u DC da ong wa katkaam ka Meghalaya Service Conduct Rules ym ye u beh kreh lane u suspend ïa ki wa kreh sorkar lait noh deiwa da dep chah kset patok ki 48 kynta. Kamwa man kini ki arngut tang chi kynta leh ym em chah kem ki. Pteiñ chooh chooh u deiwa ong kiwa em i bor u beh kreh toh du ki bor sorkar wa thung kreh ya ki.

Sa kawi ka dawa ka seiñ toh u pynmih paidbah ïa ka inquiry wa da dep leh da ka hospital. Ha ini i yachem u DC da beit u e copy cha ka seiñ tangwa ka seiñ da kyntait ko ya kani ka inquiry hadien wa tip ko toh kani ka inquiry da leh khlem da wan yachem ki wa u ma Graham wei man ko kawa yachah chiliang. Hajrong ini u DC da pynche u wa ka hospital ym em bor ko u leh ya ka magisterial inquiry kawa mut u takit palat ïa u pood u saam ka hospital. Katkam i bor ka hospital ka ye ko u leh du  ïa ki kaam poh yung ïong ka donhi.

Da ong chooh chooh u DC wa katte kani ka kaam da em ko hapoh ka ïung bichar hadien wa dep e FIR u ma Graham ïa ka mukotduma da booh ha ki kyndon ka CrPC Section 341 wa ka section 506 wei daw rai ka yung bichar ïa kiwa bakla.

Da pynkut u DC deiwa ong wa kiwon ki kaam wa leh da kiwon kiwon ki seiñ kawa pynwit ïa i jingim ki paidbah nadooh i khih khan i lai i wan man i iwa beaiñ wei daw pynchitom ïa kiwa pynwit ïa i jingim wa man ka sngi ki paidbah. Da ong u wa ha ka sngi wa thmu ka seiñ EJNC u chong kyllaiñ myngor leh man iwa beaiñ tagwa toh ha ka sngi wa ym em u cha Jowai meite da leh u kat kam ki kyndon ka aiñ.

Heijoor i por nei liang ka seiñ da rai ki leh wow pteiñ wei wow boodien ko yeini i kaam khlem chong ngiah.

Advertisement ad1

1 Comment

  • October 27, 2015 at 2:33 pm
    Kamar Benison

    Hap beh kreh hi ia kitu ki bru wa kreh ha hospital watoh Lada m ki ha Katu ka hospital Dang ak heh ak meng ki .. . Nga jooh chem watoh ki nongkreh hospital hi wa hikai u mynthu Kat cha wajan wi Katu ka nonge receipt lh kawa khor ktien bha sniaw kam katai ka hospital toh ka yong ki as ioh ki I leh katwa ngait ia kiwa kjut wa shitom n.a. nongkyndong ..

    Reply

Leave a Reply