Shillong: Ki MLA ka Congress hapoh i yahkhmat u Dr. Mukul Sangma uwa man leh u Montri Rangbah warim ka jylla, da kyntu u ya u Lat, u Satya Pal Malik wow phah pynman noh ya ka Election MDC ha Garo Hills Autonomous District Council (GHADC).
U Dr. Mukul da ong u wa ka sorkar da pynslem kyndeh ko ya ka Election MDC ha GHADC kawa da kut noh ka samoi ha u Naichiphaw uni u snem, deiwa ong wa neiliang ka Congress da pynsñiaw ko ha u Lat wa ym myntoi de wow pynslem ya ka Election.
Katkam i ong uni u heh ka Congress, i pynslem ya ka Election MDC ha GHADC da jia i leh heipor wa dang synchaar ka Congress, tangwa ini i pynyinsur ya ka Election ha itu i por toh hadien wa da yohbor na ka MHA neidaw wa em i yaklam yasuk wa ka ANVC, wei emkaam leh wow pynboon ya ki MDC wei wow pynkupbor chooh chooh ya ki District Council.
Da ong u leh wa heitu i por hanlada ka sorkar jylla da pynbna ko ya ka Election, tangwa neiliang ka sorkar India da phah pynyinsur ko yei por pynman Election neibhah ka soskular wa da yasoi wa haap pynkylla ya ka Sixth Schedule da ka Parliament, deiwa pynrap wa hajrong ini, da pynyinsur noh ya ka Election wei ymtoh de i rai ka sorkar jylla.
U Dr. Mukul da ong u leh wa i pynslem ya ka Election MDC katni ym em yumut de ko deiwa e daw wa em ka khlam COVID-19.
