Kyntu ka KHADC wow tuklar ha UN hajrong i kær sainaar chieh wa u pood wa ka Bangladesh wei wow pyndam ya ka NOC

Shillong: U HS Shylla, Chief Executive Member (CEM) ka Khasi Hills Autonomous District Council (KHADC), da pynsñiaw u wa ka Council daw thoh ko cha ka sorkar jylla wa ka sorkar pyrdi wow kyrpaad ya ka United Nations wow pait lang wow yada ya ka hok mantre ki khian paaid kani ka jylla.

Yeini da ong u ha ka sngi wa ar ka dorbar tlang ka KHADC hawa jubab ya ka phang wa wanrah da ka MDC na Nongskhen Constituency, ka Grace Mary Kharpuri hajrong i thmu ka sorkar wow lai chakhmat wow kær sainaar chieh ha ki thaw khappood wa ka ri Bangladesh, kiwa hap ha East Khasi Hills wa West Jaiñtia Hills District.

Ka Grace da pynsñiaw ko “Hadooh katni ympu ye wow pynbait ya u pood u ang (Border Pillar) wa ka Bangladesh wei ka jylla da dooh ko boon tylli ki thaw tangwa ka sorkar thmu bait ko wow kær sainaar chieh ya ki thaw khappood nadooh Nongjri, East Khasi Hills hadooh Jaliakhola, West Jaiñtia Hills khlem pynbait ya u pood u ang “.

Da pyntip ko wa da yoh ko ya ka chithi na ka Co-Ordination Committee on International Border (CCIB) kawa kyrpaad wow tuklar hajrong ka Indo-Bangladesh Fencing na Nongjri Pillar No. MP1255 cha Pyrdiwah – Dawki Pillar No. MP 1272 khlem dooh yei thaw.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

“Da sñiawthooh wa da kyrpaad wow kær sainaar chieh hajan u mawpood (Zero Line) tangwa ka sorkar thmu ko wow kær 150 Yard na u Boundary Pillar wei lada kamni daw dooh yei thaw wa palat 3000 Acre wei da toh wow pynbait chwa ya u pood u ang wa ka ri Bangladesh katkam ki kyndon,” da ong ka Grace.

Hawa jubab, u CEM da ong u wa hajrong i dawa wow kær na ‘Zero-Line’, ka Council daw kyrpaad ko wow tuklar lang ka sorkar pyrdi neibynta wow yada ya ka jylla wa ki khian paaid wei toh u burom ko leh ya i ebor NOC na ka KHADC.

U Shylla da ong u leh wa i maa wa ka ri Bangladesh chem ko toh yei chah tymmooh ha ka um nei ku ka duriaw wei da emkaam jhan wow yada ya ki tre thaw kiwa man ki khian paaid wow yoh yada ki nei wan kiwa na baar kiwa poi wiar nei kylla ka rymaw.

Da pynrap u deiwa ong wa ka sorkar pyrdi toh u paan ko ki laad yada na ka United Nations Declaration on the Rights of Indigenous Peoples (UNDRIP) deiwa pynlait ya ka Meghalaya na ki kyndon kiwa yatoh wa ki poiwiar.

Ka Grace da kyntu joor ko ya ka Executive Committee wow tuklar lang hajrong kani ka bynta, man ko kawa ktah hadooh kattæ kattæ ya ki paidbah khamtam eh ya ki thaw rep yong ki. Da kyrpaad ko leh ya u CEM wow chimkhia  khamtam wow dam chwa wow e NOC wow kreh neibynta u kær sainar chieh kat wympu pynbait ya u pood u ang.