Jowai: Ka bynta wa ka-it wa rap paw næ ka thaw uiñke pyngngad wa em ha Jowai, ka Syntu Ksiar kawa haap hapoh u pood u ang ka Dorbar Chnong Panaliar, neiliang ka chnong khlieh u snem khut ko yei yakrehlang ki paidbah khamtam ha kam kini ki samoi tlang wa boon ki bru wa wan uiñke, ha uni u snem leh neiliang u waheh chnong u R. Laloo, u General Secretary C. Phawa wa u Asst. General Secretary u W. Sumer deilang ki Executive Member da booh biang ki yei kyrpaad yaki paidbah nadooh kiwa jan wa na jngai wa hawa wan ki cha kani ka thaw wow sñiawbha ki wow wan dei akor burom wym toh u mih iwon iwon i klam sih, wei wym toh u leh yaki kaam wa man pyrchah yaki aiñ chnong.
Heijooh i por ong ki wa em boon ki thaw baam-doh sñiawbha haki bynta ka Syntu Ksiar, tangwa da kyrpaad yaki paidbah wym hoi u leh taroi yaki soodong sookun, neibhah kamwa ka chnong da khang pyrchah ko, wei lada chem won ya kiwa leh pyrchah daw chah pyndaiñkuna ki nalor i pynchitom katkam ki aiñ chnong.
U waheh chnong da khana uwa da leh ya ini neipor cheipor wei da khut ki ya i ya krehlang toh wa haki snem wada lai mar ya sdang ka samoi tlang yoo hi ki yei ya krehlang ki paidbah wa wan uiñke, tangwa katwa nang lai ki por won yoo ki wa i leh taroi næ i leh tngit ki paidbah ym em u duna.
Kamtæ ha uni u snem da pynkhreh ki yaki aiñ chnong wa rap pyrkhiñ chooh chooh nalor ki kuna næ ki Fine leh kiwa rap heh lada chem ya kiwa tyngkheiñ aiñ.
Discussion about this post