Shillong: U Montri Rangbah ka jylla, u Conrad K Sangma da ong u wa ka High Level Committee (HLC) kawa da thung da ka sorkar da lai ko chaaid chaaid ha ka kaam wow puræ bniah wei wow thooh ki laad ki luti wow wow kyrriah ya ki kharmator na Them Iewmawlong wei dang chong bichaar bniah yeini i kaam deiwa pynrap wa dang boon kiyi kiyi wow pyndep hajrong kani ka phang.
U Conrad da pyntip u wa ha i lai sylli u montri ka tnat pynroi sor, u Hamlet Dohling ya ka yungkrehkaam ka Shillong Municipal Board (SMB) leh toh chibynta hajrong kani ka kaam.
Hawa yatoh wa ka suk ka saiñ ha ka nongbah, neiliang u Montri Rangbah da ong u wa ka sorkar dang pait bniah bha ko yei man i long ka chong suk chong saiñ ha ka nongbah, neibhah katni ym man ko kam ha kiwi tawon ki por.
Da kyntu u ya ki paidbah wow pynneh ya ka chong suk chong chngaaiñ wei wow yaichah yei kreh ka HLC hajrong kani ka kaam.
“Lada thut i chong suk daw ktah ko ya waroh ki liang, khamtam ki paidbah wei nga kyntu O ya waroh wow pynneh ya i chong suk wei wow man kiwa yaichah neibhah ka sorkar ym em u chong ngiah ko heiyatoh wa ka kaam Kharmator,” da ong u Conrad.
Hajrong i chah kem ki bru na i yakhih Kharmator, u Conrad da ong u wa ya kani ka kaam da ekti bait ha ka tnat aiñ wei ka sorkar ym em bynta ko wow tuklar.
Heijooh i por da ong u wa ka sorkar da pynlait noh ko ya ki kattu katni kiwa da chah kem heipor wa em i yakhih hadien wa da chem wa man ki kiwa dang khynnah wei ym em bynta ki ha kani ka yakhih, tangwa da pynrap wa ya kiwi won ka aiñ daw leh ko yeiwa emkaam.
Discussion about this post