15 49.0138 8.38624 1 0 4000 1 https://wyrta.com 300 0

Kyntu u DC ka WJHD wow chim kabu ya ki Scheme baibam tymmen

0 Comments
Advertisement ad1

Jowai: Haka yalang wai paidbah yaka Scheme baibam tymmen watip kam ka Pradhan Mantri Shram Yogi Maan-dhan (PM-SYM) waka National Penshon Scheme (NPS) wa pynman ka yungkrehkaam yong ka chnat Labour, West Jaiñtia Hills District ynnin sngi 30 tarik u Khonchonglad (Nov) ha District Library Auditorium, Mynthong, Jowai u Deputy Commissioner ka West Jaiñtia Hills District u Garod LNS Dykes da kyntu u yaki paidbah wow chim kabu yaka deiwa pynpsiah pyrtuid hapoh kini ki Scheme, neibhah man ko kawa e myntoi bha.

Ong haroh u kawa kam kani ka Scheme yarap ko wym toh de ka sien nyngkong, tangwa kani ka sngi man ko chibynta u pynkynmoo yaki paidbah, neibhah naki boon hajar ki wakreh mylla hei kreh waphær waphær ki wym toh kiwa kreh sorkar hadooh katni dang em du kamwa 200 tam kiwa wan pynpsiah pyrtuid hapoh ka District.

Heijooh i por chim haroh u ka kabu wow kyntu yaki paidbah wow chondur Aadhaar ki neibynta i suk yong ki hi mynstep mynkawi, deiwa ong leh waroh wym ye i wow lai lait yeiwon iwon i sakhiat katwa dang toh kiwa chong chnong ka ri India lada i kwah i, næ emkaam ya kiwon kiwon ki Scheme yarap naka sorkar. 

Chooh chooh ong u wa ha kini ki por wa dep em boon ki paidbah wa dooh myntoi naka sorkar du neidaw wym em ki ya u Aadhaar.

Neitæ da pyntip u wa ha ka tayaw nyngkong waka tayaw wa ar u bnai Kmaichonglad (December) daw pynman biang i pynpsiah pyrtuid Aadhaar haka District wa ha ki Block, kamtæ kyntu u ya kitu ki wym pu em chondur wow lai chondur næ pynpsiah pyrtuid. 

Neiliang u Deputy Labour Commissioner, West Jaiñtia Hills District u S. Lamin hawa klam pynche hajrong kitai ka Scheme baibam tymmen ong u, kiwa ye u yoh myntoi næ pynpsiah pyrtuid ha katai ka Scheme kynthup nadooh ki wakreh mylla, kiwa khayi, ki wakreh i kaam yong ki hi, ki warep wa kiwi kiwi ki jait kreh lait noh kitu wakreh sorkar.

Ya katai ka baibam tymmen daw yoh ki T.3000 chibnai hadien wa dap  60 snem i rta, wei i rta wa ye wow pynpsiah pyrtuid toh kitu kiwa da dap 18 snem hadooh 40 snem i rta. Neitæ hadien wa dep thap pyrtuid i dor wa hap wow kynchew man ka bnai chong katkam i rta, kitu wa thap pyrtuid nadooh i rta wa dang khian i kynchew yong ki leh rap khian, wei yei pynpsiah pyrtuid ye ki wow lai cha ki Common Service Centre ne (Rainbow Digital Seva-CSC) wa em chajan yong ki ha sor næ cha palat sor. 

Kamtæ kyntu u yaki paidbah wow chim kabu ya kani ka Scheme wada wanrah daka sorkar India khnang wow pyntikna ki yaki hi wow yoh baibam tymmen hadien wada dap 60 snem.

Ha kani kajooh ka sngi da ye leh wow pynpsiah pyrtuid kamwa 20 ngut ki paidbah neidaw wa ym em bordiñ wei kiwa wan chimbynta ha kani ka sngi da em ki kamwa 300 ngut.

0 Comments

Leave a Reply