U montri ki kaam yada ri ka India, u Rajnath Singh, ynne ka sngi da kyntu u ya ki paidbah wow e yarap sñiawbha ki cha ka Armed Forces Flag Day ka wow man ha kani ka 7 tarik uni u bnai kam ka dak wow kyrchaan ya ki chipai ka ri.
Da ong u wa kani ka poisa daw pynemkaam ya ka neibynta i bha i miat ki chipai wa da chong-ngiah namo ki Ex-Servicemen wa kiwa hayung hasem yong ki.
Ka Armed Forces Flag Day ya kawa da jooh tip leh kam ka Flag Day of India toh wow khrong poisa na ki paidbah ya kawa da leh ha ka 7 Kmaichonglad man u snem nadooh u snem 1949 kam ka dak wow kyrchaan ya ki chipai ka ri.
Kam wow pynkynmoo heini, ha ka 28 Naisaphra 1949, da chna ya ka Committee hapoh ka Defence Ministry kawa da rai wow pynman ya ka Flag Day man u snem ha ka 7 Kmaichonglad.
Yeini da leh deiwa saam ya ki lama khian cha ki paidbah wei wow chim kylliang won da ka poisa yarap na ki (paidbah) iwa pynyoo yei kaamram yong ki paidbah neibynta i bha i miat ki chipai wa kiwa hayung yong ki.
Ya ka poisa wa yoh da pynlang da ka Kendriya Sainik Board (KSB), kawa man ka chnat hapoh ka Ministry of Defence wei neitæ won da pynemkaam ya ka neibynta i bha i miat ki chipai ha jar jiar ki jylla wa ki Union Territory.
