Ka Ministry of Education ka sorkar India ha uni u snem da pynmih ko ya ka hukum wa ong wa waroh ki khynnah emkaam ki wow yakhun ya ka Common University Entrance Test (CUET) khnang wow ye ki u lai puræ ha ki kyrdan waphær waphær ha ki skurbah wa tipmit (Deemed University) da ka sorkar pyrdi.
Ya kani ka Exam daw emkaam hi wow yakhun da waroh ki khynnah puræ ki jylla ka ri chwa wow lai puræ ki ha ki kyrdan kam ki Under Graduate, Post Graduate, Diploma wa kiwi kiwi.
Heiyatoh wa ini neiliang u MLA ka Jowai, u Wailadmiki Shylla, da kyntu u ya ki khynnah khynroo khyllood khamtam kiwa dang yang ya ka Result HSSLC wow chimkhia ki ya ka CUET neibhah lada ym yakhun ya kani ka Test daw chem chitom wow yoh Admission ha ki skurbah (University) wa em ha ka ri.
“Ham yang ya ka Last Date wei emkaam wow pynpoor yeini cha ki khynnah khynroo khyllood wei khamtam ki manbei manpa wa kani ka Test man ko kawa kongsan tam khnang wow ye u pteiñ yei puræ,” da ong u Wailadmiki deiwa pynrap wa emkaam wow yakhun ya ka yow lait u silet hadien.
Heijooh i por da kyntu u ya waroh ki khon ka Ri-loom Jaiñtia wow wan chaphrang wow yakhun ya kani ka CUET neibhah kam kiwa mihkhmat ymye ki wow yarap ya ki khynnah manda dier i por.
Kam wow kdaw heini neiliang ka sorkar jylla da thoh ko cha ka UGC wow booh ya ki thaw thoh CUET ha ki 12 District ka jylla.
