Ynne ka sngi u MLA ka Jowai, u Wailadmiki Shylla da thoh u cha u Montri Rangbah ka jylla, u Conrad Sangma wa cha u montri ka chnat PHE, u Renikton Lyngdoh heiyatoh wow e ya ki kor Pump um wa thymme cha ka chnat PHE ha Oorkhla, Khimmusniang neibynta wow pynkhlan ya i rukom saam um hapoh Jowai.
Neiliang u Wailadmiki da e u da ka chithi cha kini ar montri heiwa da pyntip u wa ki kor yong ka Jowai Water Supply Scheme (JWSS) na Wah Myntdu wa pynemkaam katni toh kiwa da rim kiwa da kynjoh kamwa 19-20 snem wei kini ki kor da slah sih ki neibhah wa da pynemkaam ya ki hadooh kamwa 20 kynta ha ka chi sngi wow pynpoi um cha Jowai.
Da ong u wa katkam wa man katni dang pynemkaam ya kini ki kor hanlada palat ya i rta krehkaam yong ki.
Chooh chooh da kdaw u ya ka chithi na ka chnat PHE kawa ha ka 9 tarik uni u bnai wa da thoh ko cha ka sorkar wa emkaam kamwa T. 4.48 klur hapoh ka State Plan wow kylliang thymme noh ya kini ki kor.
Hajrong ini hawa yaklam wa u MLA da ong u wa katkam wa man kattæ i kreh ha ka Scheme saam um na Wah Myngngot ya kawa da tip kam ka Renovation of Jowai Water Supply Scheme (RJWSS) iwa boon toh iwa dadep wei ka um da ye u pynpoi ya ka hadooh ha chiteiñ riat wei na chiteiñ riat daw pynpoi ya ka ha khlieh ka chnong Sohmynting khnang wow ye won u phah ya ka cha Oorkhla.
Da pynrap u wa neidaw wa ki kor wa em ha Oorkhla da man ki kiwa rim wei da slah sih ki emkaam da ki kor thymme ha ini i thaw khnang wow ye u pynkhlan ya i rukom pynpoi um cha ki manyung ha Jowai khlem iwon iwon i thut.
U MLA da pyntip u wa neiliang u Conrad wa u Renikton da kular ki wow chimkhia wei wow thooh laad kammon wow yoh ya kini ki kor khnang wow myntoi ki manyung ka Jowai wa ki khon ka Ri-loom Jaiñtia kiwa wan chong sah ha kani ka chnong.
