Shillong: Ka Khun Hynniewtrep National Awakening Movement (KHNAM) State Youth Wing ynne da kyrchaan ko yei dawa ka Synjuk Ki Nongsynshar Shnong Ka Nongthymmai Pyllun (SNSNP) wow pynkylla ya ka thup Scheduled Tribes/Castes katkam ka Presidential Order 1950 wow pyndam ya ki pyrtuid ST na kani ka thup neidaw wa em ki jaitbru ki wymtoh na ka Meghalaya.
“Em ki jaitbru wa pynemkaam bakla wow yoh myntoi ha Meghalaya wei em ka hukum (Notification) wa pynmih ka sorkar pyrdi ha ka 2 Naisan 1975 ya kawa da phah cha waroh ki Chief Secretary kawa da kdaw wa em ki jaitbru ki wymtoh na ka jylla kiwa pynemkaam bakla yeini wow yoh myntoi iwa ka sorkar ym em leh ko yeiwa emkaam,” da ong u Thomas Passah, President ka KHNAM-SYW.
Da ong u wa ki jaitbru na kiwi ki jylla lyngba kani ka thup yoh khih yoh kreh ki hapoh jylla lyngba ka Reservation ha Meghalaya iwa da ktah kylla ya ki jaitbru napoh ka jylla.
“Ha ki bnai wa dadep boon kiwa kreh ha FCI toh kiwa na Rajasthan neibhah wa kam ki wa man ki ki ST wei da kam ki ya ka bhah ka Meghalaya iwa man i wymye u pdiang,” da ong u.
Da ong u leh wa katkam ka riti synchaar ka ri du ka Parliament wa ye wow pynkylla ya ka thup wa em ki pyrtuid ki jaitbru namo Scheduled Tribes/Castes ha kani ka Presidential Order 1950.
Da kyntu u leh ya u Conrad K Sangma wow chimkhia yeini khnang wow yoh myntoi hok ka jylla deiwa kyntu ya ki seiñbhalang wow kyrchaan ya i dawa ka Synjuk.
Da ong u leh wa la 47 snem wa da yoh jylla wei ymtoh u pynbaad ya kiwa mihkhmat wa rim lada hajrong kani ka bynta namo u pood u ang wa ka jylla Assam.
Chooh chooh da ong u wa ha ka hukum wa pynmih ha ka 2 Naisan 1975 daw ekti ya ka ha waroh ki 60 MLA wa ha ki MDC ka KHADC.
Heijooh i por da tyrwa u wa ha ka ST List toh u thoh Khasi chirup wa ki Sub-tribe wow kynthup ya ka Khynriam, Pnar, Bhoi, War wa Lyngam.
“Katkam wa man ka hukum yong u 1950 ki Khasi yaphær ki na ki Jaintia wei ha ka thup ki Khasi, Pnar wa Synteng man ki ki jaitbru wa yaphær tangwa waroh le toh u em ki hapoh ka Khasi,” da ong u.
Discussion about this post