Jowai : Ka seiñ Pnar Student Union (PSU) seiñbei, hei yatoh wei paan dak thoh Pnar ka Jaiñtia Student Union (JSU), ha kini ki sngi wa da dep ka seiñ PSU ka da e ko i kyrchaan wa pura ya ka JSU hajrong i dawa yong ka neibynta wow pynneh pynsah ya ki dak thoh.
Ynne ka sngi ha ka khubor wa da pyllait da u W. Syngkon u General Secretary ka PSU, da ong u wa i paan dak ka seiñ JSU toh iwa em nongrim neibhah ki dak thoh Pnar da em chwa ki, weiwa i paan ya ki dak thoh toh yow pynneh pynsah ya ka ktien ka thylliej wa ka Riti Dustur yong ka jaitbru uwa da booh u warim wajah.
Hei yatoh weini da ong wa i dawa ka JSU ya ki dak Pnar ymtoh yow pynyaphær jait kani toh du i sñiawthooh bakla yong ki kattu katni ngut, hei yong sakhiat kat dang boon ki dak thoh kattæ dang bha.
Ka seiñ leh da kyntu ko ya ka Jaiñtia Hills Autonomous District Council (JHADC) ha chwa wow chna ko ya ka Committee hajrong ki dak thoh Pnar yow khut lang ko ya waroh nadooh ki bru chemphang, ki proh jabien, ki Dolloi wa kiwi kiwi de hapoh ri-loom Jaiñtia yow pynwandur lang ya ka ktien Pnar, khnang wa i rai wa khaddooh u man ki kiwa man soh nei bynta ka mynried yong ka jaitbru khnang wym mih i eh hadien ha bood.
Ka PSU da khut lang ko ya waroh nadooh ki seiñbhalang, ki wa mihkhmat wa ki paidbah yow e ki i kyrchaan wa pura ya ki dak thoh Pnar kamjooh ya ki dak thoh Khasi wa ya kiwi de ki dak thoh yow pynpsiah hapoh ka Eight Schedule yong ka Ri India.
Discussion about this post