U Wailadmiki Shylla, MLA ka Jowai uwa man leh u Chairman ka MUDA hawa lai booddien lai pait yei pynkreh ya ka Mini Secretariat ynne ka sngi kawa da chna ha pchem ka PWD ha Jowai, dap u dei sñiawkmen wow yoo wa i kreh man iwa dadep la 85%.
Ya kani ka Mini Secretariat da wai mooyurim ya ka ha u bnai December 2022 da u Montri Rangbah ka jylla, u Conrad K. Sangma, wei ynne ha kani ka sngi wa lai pait lai sylli u MLA da emlang leh chirup ki sahep ka chnat PWD wa u Contractor.
U Wailadmiki hawa klam ong u, kam u MLA hi kwah u wa kawon kawon ka kreh wa da sdang toh leh wow yoo yei dep katkam i por wa da booh khnang yow man i kyrkhu ya ki paidbah wa pynemkaam.
Kamwa man kattæ i kreh wa dadep toh 85% katwa 15% won iwa dang sah toh ki khutia mutia wa boon jait iwa jooh rap chimpor leh wa kynthup wow pynbiang bordiñ, ka um, wow niaam rong, wow pynchna ya ki soodong sookun wa kiwi.
Da pyntip haroh u wa ha kani ka Mini Secretariat em 3 tylli ki Block wei yei rukom kreh leh da bhah jar jiar. Kani ka Building wa da yieñ katte toh ka West Block, kiwa daw khut kreh won sah sa ka East Block waka North Block.
Ya kani ka West Block da mang i chna hei lut wa Rs. 20 klur, katwa neibynta ka East Block waka North Block won kawa daw khut kreh da mang kamwa Rs. 29 klur.
Heiyatoh wa kani wa daw khut kreh ong u wa neiliang yong oo dadep pynkynmoo u cha ka sorkar wei wot ha ka Assembly ini wadep leh da pynkynmoo u ya u Montri Rangbah deiwa yooluti leh wa daw yoh hi.
Pynrap haroh u wa i ye chwa u dep ya kani ka West Block leh man i kyrkhu wa khroo wow pynstiñ ya ka DC Office deiwa ye u kyrriah kattu katni tylli ki chnat cha kani ka yung thymme.
Discussion about this post