Shillong: U montri wa pait ya ka kaam pohyung ka jylla, u James K Sangma da ong u wa ki pulit ynne ka sngi da kem ki sa ya kawi ka manbei wa suba emkti hei chah thombor ka Agnes Kharshiïing wa ka Amita Sangma ha ka 8 tarik uni u bnai, wei yeini da leh hadien i takit ki pulit yeiwa jia.
“Katkam ka yutip wa yoh O, ynne ka sngi da kem ya kawi ka manbei wa suba wa emkti wow thombor ya ka President ka CSWO wa ka lok yong ka, wei kyrmen i wow yoh kem chooh ya kiwa emkti ha kani ka kaam,” da ong u James.
Da pyntip u leh wa i takit dang man i iwa lai chakhmat wei ka sorkar kwah ko wow pynchitom ya kiwa emkti ha kani ka kaam.
Katkam ka yutip wa yoh na ki pulit ka East Jaiñtia, da ong wa da kem ya kawi ka manbei na ki thaaiñ Ummulong, West Jaiñtia Hills heipor wa dang thmu ko wow lai cha East Jaiñtia Hills wei hadien wa takit ya ka da chem wa ym emkti ko ha ini i jia wei da pynlait noh ya ka wei khlem em ki sabut pyrchah ya ka.
U James da ong u leh wa hadooh katni ympu yoo emkaam wow thung phah takit da kawi ka dhab hajrong kani ka kaam.
Hawa jubab wa i jia toh iwa emkti ki heh spah wa ki pulit, neiliang u James da ong u wa ki pulit rap tip ware ki yeiwa jia wei lada emkaam ka sorkar hi daw chong bichaar ko ki.
Heijooh i por da ong u wa u heh ka Congress, u Zenith Sangma ymtoh wow pynbaad u khlem tip yeiwa sakhiat wei lada man i iwa sakhiat (pynbaad u Zenith) toh u wanrah u chirup wa ki sabut wa dawa u wow e ya ka takit cha kiwi ki bor ka aiñ.
Discussion about this post