Ynne ka sngi u kyrtong ka BJP na Jowai, u Allan K. Suchiang da wan thap pyrtuid u wow yakhun ya ka Election MLA 2023.
Hadien wa thap pyrtuid hawa yaklam wa kiwa pathai khubor da ong u wa ka thong yong oo wow yieñ na ka BJP toh kawa ye u krehkaam hapoh ka Constituency neibhah wa em ko leh ha ka sorkar pyrdi wei yooluti u wa i kaam leh u man soh ki heini.
Da ong u wa kani ka Constituency em ko ar bynta, ka sor waka palatsor heiwa ha sor da chem wa em chiboon i duna kam ha Iawmusiang heiwa ym em ki thaw noh jhep, wei emkaam u chna pynmiat ya ki sarok wa i rukom saam um, da taroi lut ki sarok ha Jowai heiwa da thap ya ki Pipe ha ki dooid wei emkaam wow pynkylla dur namo Redesign biang ya i rukom saam umkor wow man ka um wa khooid wei iwa salonsar.
Chooh chooh da ong u wa ki thaw puræ kam ka Kiang Nangbah Government College wa kiwi ki skur dang em chiboon i duna nadooh ki tiar wow e sikai wa paka cha ki khynnah wei manda jop u daw sylli u wow pynsñiaw cha ka sorkar hajrong i emkaam ki khynnah deilang wa ki sabut.
Ha ki thaw palatsor toh u pait ya i yoh i laa ki paidbah heiwa da ong u wa emkaam u puræ kammon u kyntu kynrong yei yoh i laa yong ki nadooh ki sarok, ki sboh, i stat i tip wa kiwi kiwi.
Heiyatoh wa i chait i khiah da ong u wa ka MCH ha Panaliar ki tiar boon ki wei i tyrwa toh kani ka thaw u pait ko ya ka sor donhi katwa kawa ha Ialong won u pait ko ya ki palatsor ki ar District ka Ri-loom Jaiñtia. Da ong u wa boonsien hawa emkaam u leh du ya ka X-Ray wa kiwi ki Test emkaam ki wow lai cha kiwi ki thaw wei da yooluti u wow pynbiang ya ki thaw sumaar khnang wow lait ki bru u lai cha ki thaw ki bru samen.
Hawa kylli yei sñiawskem wow jop, neiliang u Allan da ong u wa itæ waroh chong i ha ka sngi wow ñiaw Vote neibhah chong i ha kiwa jied, deiwa kyrpaad ya ki paidbah wow jied ya ka Party khnang wow ye u yarap wa pura wow yoh i kylla neibhah ka Party em ko ha sorkar pyrdi wei kam ka sorkar bei emkaam hi wow pait u pyndap pynbiang ko ya ki khon yong ka.
Da yooluti u wa lada jop ka BJP ha Jowai daw yoh myntoi wa chyrkhei bha wei kam oo u sahep wa em ya ka Technical Background, ka BJP leh man ko kawa pait ko ya ki bru wa ye u e yukheiñ wa emkaam din-pa-din top-pa-top.
