U President ka Hynniewtrep Youth Council (HYC), u Robertjune Kharjahrin da ong u wa ha ki sngi wow wan lada ka sorkar ym pynyoo dak ko wow yaklam pynbait hajrong i pynkrehkaam ya ka ‘Roster System’ ka seiñ ym yohsa ko wow mih yakhih cha sarok, lane wow lai noh cha ka yung bichaar kamwa da klam da u Montri Rangbah ka jylla, u Conrad Kongal Sangma neibhah da klam che u wa kitu ki wym hun ya ka Roster System wei wow lai cha ka yung bichaar.
Ynne ka sngi neiliang kiwa yahkhmat ka HYC da yachem ki wa ka Montri wa pait ya ki kaam aiñ (Law) yong ka jylla, ka Dr. Mazel Ampareen Lyngdoh yow e yumut cha ka sorkar, heiwa da khana ko wa neiliang yong ka kam ka Montri da kular ko wow chimkhia wow rah yei e yumut yong ki cha u Montri Rangbah.
U Robert da ong u wa lada jia wa ka sorkar ym leh ko iyi iyi wei lada yieñ bait ha ka yurim wa kitu ki wym hun ye ki wow lai cha ka yung bichaar, daw poi i por wa hap wow yakhun ya ka Reservation Policy waroh kawi, neibhah yeini da sdang wow pynkhih da u Montri Rangbah. Da ong chooh chooh wa lada kwah ki wa ka kachari u muchlia lut ya ini i kaam, iwa maa toh ya em kitu kiwa rhah daw poi ki chei jæd.
Da khana u wa da yoh yutip kawa tikna wa kiwa boon ki chnat krehkaam sorkar ym em de ki ya ka thup namo ki Record nadooh u snem 1972, wei da pynrap u wa kammon u kyruiñ biang cha u snem 1972 hawa ki chnat ym tip de ki.
U President ka HYC da ong u wa neiliang ka HYC kwah ko wow yaklam chwa wei wow e yumut hanla u Montri Rangbah ym kwah u wow klam de hajrong kani ka phang neibhah da klam che wa ki wym hun ya ka Roster System ye ki wow lai cha ka yung bichaar.
Hawa kylli, u Robert da ong u wa hadooh katni, ka seiñ ym em ong ko wow pyndooh pyndam ya ka aiñ bhah kaam namo ka Reservation Policy, tangwa kwah ki wow pynbait chwa yei pynkrehkaam ya ka Roster System dei wym toh u kyruiñ chadooh u snem 1972, tangwa wow pynbha wei pynjanai ya ka Reservation Policy.
